Die Suid-Afrikaanse skeerder Zweliwile Hans het die naweek wol in die oë van ander handskeerders geskop toe hy tydens die Wêreldskaapskeerkampioenskappe in Masterton, Nieu-Seeland, as wêreldkampioen in die handskeerafdeling gekroon is. Dit is die vierde keer dat hy dié gesogte titel verower.
Sy spanmaat, Mayenzeke Shweni, was tweede. Albei is van Sterkspruit in die Oos-Kaap en skeer heeltyds. Shweni is egter as die Nieu-Seelandse kampioen-handskeerder in die opeafdeling aangewys, met Hans in die tweede plek. Nieu-Seeland het sy nasionale skeerkampioenskapsbyeenkoms terselfdertyd aangebied en deelnemers aan die wêreldbyeenkoms kry dan geleentheid om ook hieraan deel te neem.
Die wêreldbyeenkoms word tweejaarliks in ’n wolproduserende land aangebied. Die vorige byeenkoms was in Wallis. Suid-Afrika het dit in 2000 aangebied. Top-skeerders van 25 lande het vanjaar ingeskryf om vir die gesogte wêreldkroon in die hand- en masjienskeerafdelings mee te ding.
Suidelike Afrika kraai sedert 1994 koning in die handskeerafdeling toe Elliot Ntsombo van Lesotho die eerste deelnemer uit Afrika geword het om dit te wen. Hy het nie vanjaar deelgeneem nie. (Ntsombo is nege van Suid-Afrika se tale magtig.)
Skaapskeer is fisiek een van die veeleisendste beroepe ter wêreld. Dit neem ’n skeerder sewe tot agt jaar om ’n vlak te bereik om vir kompetisies soos dié te kwalifiseer. Terloops, ’n skeerder verbrand meer kalorieë tydens ’n normale werkdag van agt ure as wat ’n rugbyspeler tydens ’n rugbywedstryd verbrand.
* Lees meer oor ‘n span Australiese sheilas wat skaapskeer hul beroep gemaak het.
3 Maart 2012
