Weens die ineenstoring van die Land Bank, wat ’n finansieringsvakuum gelaat het, bly landboufinansiering een van die grootste knelpunte vir Suid-Afrikaanse boere, sê dr. Theo de Jager, direksievoorsitter van Saai.
Saai het onlangs tydens ’n webinaar ’n aantal inisiatiewe van verskillende instellings uit die private sektor wat hierdie gaping probeer vul, aan boere en landbou-ondernemings bekend gestel.
Volgens De Jager het handelsbanke reeds begin om finansiering te bied aan honderde voormalige Land Bank-kliënte en hulle probeer steeds maniere vind om voormalige kliënte te betrek.
“Dit kos die boer wel ’n bietjie meer. Die handelsbanke het dus op die groter boere gekonsentreer en daarin geslaag om ’n paar van die sterkste en mees gevestigde boere as kliënte te kry. Dit maak dit vir die kleiner en mediumgrootte boere nóg moeiliker om finansiering te bekom.”
Hy sê sommige koöperasies en insetverskaffers het daarin geslaag om buitelandse finansiering te bekom om die Land Bank as oorspronklike lener te vervang. Hierdie proses het sy eie risiko’s, soos wisselvallige wisselkoerse, en dit het hierdie koöperasies bykans vyf jaar gekos om kanale te skep en prosesse in werking te stel voordat hierdie finansiering beskikbaar gemaak kon word.
’n Ander opsie wat volgens hom op korter termyn beskikbaar is, is die vooruitkoop van produkte, veral by invoerders van die Verenigde Arabiese Emirate en elders in die Midde-Ooste. “Daar is ’n oorvloed geleenthede hier, maar dit is ’n druppel aan die emmer om landwye voedselsekerheid in Suid-Afrika te verseker.”
Rabobank, ’n koöperatiewe bank in Nederland wat ook in ’n aantal buurlande en elders in Afrika teenwoordig is, het sy gewilligheid en voorwaardes vir uitbreiding na die Suid-Afrikaanse landbousektor aangedui. “Op lang termyn sal die droom verwesenlik kan word om ’n koöperatiewe bank in Suid-Afrika te vestig wat aan die boere self sal behoort.”
Hy sê namate planttyd nader kom, raak boere al hoe meer desperaat vir finansiering aangesien daar sonder finansiering geen produksie sal wees nie.
Kontak info@saai.org vir nog inligting oor van die bogenoemde opsies.
