Die aansoek wat die Afrika-sentrum vir biodiversiteit (ACB) in 2017 voor die hof gebring het om die uitvoerende raad van die wet op geneties gemodifiseerde organismes (GMO’s), die GMO-appèlraad en die minister van landbou (bosbou en visserye) se goedkeuring vir Bayer (Monsanto) se droogteverdraagsame mieliekultivar MON 86470 ongeldig te verklaar, word uiteindelik vandeesweek in die hooggeregshof in Pretoria aangehoor.
Die ACB voer aan dat daar nie voldoende data is om die beweerde voordeel van droogteverdraagsaamheid te rugsteun nie – nie wat opbrengs of landboukundige prestasie betref nie.
Luidens ’n verklaring volg die hofsaak op ’n jare lange veldtog van die ACB en ander organisasies wat Monsanto se aanspraak op verdraagsaamheid teen droogte bevraagteken. Die tegnologie is oënskynlik aan kleinskaalse boere in verskeie Afrika-lande aangebied via die Water-effektiewe mielies vir Afrika- (WEMA) projek wat deur die Gates-stigting gefinansier is.
Die uitvoerende raad van die wet op GMO’s het MON 86470 goedgekeur vir kommersiële produksie ná ’n reeks veldproewe waarmee in 2007 begin is. Die ACB se appèl teen hierdie goedkeuring is van die hand gewys deur die GMO-appèlraad en die departement van landbou. Daarom het die instelling die hof in 2017 genader en was die kommersiële verbouing van saad met dié eienskap intussen nie toegelaat nie.
In 2018 het die uitvoerende raad van die wet op geneties gemodifiseerde organismes geweier om Bayer (Monsanto) se aansoek goed te keur vir ’n stapelgeen wat MON 86470 asook MON 89034 en NK 603 insluit. Dié stapelgeen is glo geneties gemodifiseer om onkruiddoder te oorleef, bied droogteverdraagsaamheid en bied weerstand teen insekte.
Omdat Bayer intussen Monsanto oorgekoop het, is dié maatskappy nou as respondent tot die hofgeding bygevoeg.
Die ACB sê in ’n verklaring dat dié organisasie hoop dat die hof in sy guns sal besluit en dat ’n uitspraak in dié verband dit in die toekoms moeiliker sal maak om die kommersialisering van GM kultivars in Afrika te bevorder.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
