Hierdie projek, wat nou sy derde bestaansjaar vier, is ontwerp om dié studente en gegradueerdes selfs meer gereed en bekwaam te maak om betekenisvolle bydraes in die landbouwaardeketting te lewer.
Me. Nokwanda Kulu, voltooi tans haar meestersgraad in plantbiotegnologie aan die Universiteit Stellenbosch. Sy het luidens ’n verklaring gesê nie alles wat studente aan universiteite leer, word noodwendig op plase beoefen nie. “Wanneer jy vir die eerste keer in ’n werksituasie beland, moet jy nooit voorgee dat jy meer as enigiemand weet nie. Daar is altyd baie om te leer en elke dag bied ’n nuwe situasie om by iets nuut aan te pas.”
Volgens SAB sluit van die vaardigheidsontwikkeling deur die SAB LIP onder meer amptelike akkreditering om gegradueerdes in staat te stel om kunsmis en landbouchemikalieë te selekteer en te kan toepas, gevorderde opleiding vir die hantering van landboumasjinerie en -werktuie, om bevoeg te raak om mielies en gars te kan gradeer, gevorderde rekenaaropleiding en om toepaslike navorsingsmetodologie te kan gebruik in die ontwerp, uitvoer en uitkomste van proewe.
“Ons het ’n holistiese stel programme soos hierdie regoor die private sektor nodig om te verseker dat ons ’n volhoubare verandering ten goede maak en [om] jong Suid-Afrikaners die geleenthede te bied wat hulle nodig het om ’n toekoms te bou waarop ons almal trots kan wees,” sê mnr. Sphe Vundla, korporatiewe handelsmerkdirekteur by SAB.
SAB is ’n filiaal van AB InBev wat sy hoofkantoor in België het.
