Dit lyk asof ’n vrot vis in die Suid-Afrikaanse Inkomstediens (SAID) se waters rondbeweeg met sommige boere in die Vrystaat wat al twee jaar lank op volledige BTW-uitbetalings wag. Verskeie klagtes oor laat uitbetalings het Landbou.com die afgelope paar weke bereik.
Van die boere beweer dat bedrae van tot R400 000 aan hulle geskuld word, en dat hulle ten spyte van verskeie navrae aan die SAID steeds geen behoorlike terugvoering kry nie.
Vrystaat Landbou (VL) het reeds die kwessie met die SAID bespreek, maar die VL sê omdat elke boer se sake verskil en private inligting betrokke is, is die proses ingewikkeld. Die VL raai boere aan om met behulp van hul ouditeure hul sake te probeer uitsorteer.
Wil geld terughou
Baie boere, wat weens die swaar reëns en droogte asem ophou vir hul inkomste, ondervind tans probleme met kontantvloei. Van dié boere moes intussen hul BTW op koring betaal sonder dat hulle voldoende terugbetalings vir vorige betalings ontvang het.
Van hulle is so moedeloos met die situasie dat hulle hul betalings aan die Inkomstediens wil terughou: “Hoekom word yslike bedrae rente teen ons gehef as ons betalings ’n dag laat is, maar ons moet maar tevrede wees as die SAID langer as 21 dae vat om ons terug te betaal? Dis mos dubbele standaarde!”
Kapasiteitsprobleme
Hoewel Landbou.com vertroulik vanuit die SAID se geledere verneem het dat kapasiteitsprobleme met die verwerking van sommige BTW-oplaes ondervind word, sê mnr. Adrian Lackay, amptelike woordvoerder van die SAID, geen probleme bestaan in dié verband nie.
Hy sê die Inkomstediens het oor die afgelope paar weke ekstra maatreëls ingestel vir die verifiëring van terugbetalings om korrupsie en bedrog in dié verband te bekamp.
Dié maatreëls sluit die hersiening van oplaes deur middel van onder meer oudits in. Hy sê dié maatreëls is egter van toepassing op alle belastingbetalers, nie net boere in die Vrystaat nie.
“Die SAID is daarop ingestel om regmatige terugbetalings aan belastingbetalers so gou moontlik af te handel. Ons moet dit egter terselfder tyd balanseer met die belangrike onderneming om bedrog, diefstal en verkeerde betalings te bekamp,” aldus Lackay.
Hy het geen kommentaar gelewer op vrae van Landbou.com oor boere wat dreig om hul betalings terug te hou nie.
28 Maart 2011
