Sakeliga en sy regsverteenwoordiger, Kriek Wassenaar & Venter Ing. (KWV Ing.), beweer Eskom sny onwettig elektrisiteit na baie van sy regstreekse kliënte in die twee provinsies af onder die dekmantel van lasvermindering.
Afsonderlik en dikwels bykomend tot die beurtkrag wat Suid-Afrikaners lank reeds van Eskom ervaar, is lasvermindering volgens Sakeliga veronderstel om ’n toepaslike verminderde elektrisiteitsvoorsiening in spesifieke gebiede te behels. Dit is nie veronderstel om totale kragonderbrekings te wees nie.
“Eskom tree onwettig op deur elektrisiteitstoevoer op sekere lyne heeltemal af te sny, in baie gevalle sonder redelike voorafkennisgewing. Die rede is oënskynlik om te voorkom dat die netwerk in hoëdigtheidgebiede, waar daar talle onwettige aansluitings is, oorlaai word en skade aan netwerkinfrastruktuur aanrig,” sê Sakeliga luidens ’n verklaring.
KWV Ing. se aanmaningsbrief aan Eskom meld dat die kragvoorsiener se regstreekse kliënte in Noordwes en Limpopo sedert November 2021 dié soort lasvermindering ervaar. Dit, ten spyte daarvan dat die meeste van hierdie kliënte, wat uit plase, ander landbouondernemings en “kleiner organisasies” bestaan, nie binne sulke hoëdigtheidsgebiede geleë is nie.
Die aanmaningsbrief verklaar dat, ingevolge wetgewing, “vrywillige en onwillekeurige lasverminderingsgebeure gekenmerk word deur die inkorting, gedeeltelike inkorting of vermindering van klantlasgrootte, maar geen werklike onderbreking van toevoer vind plaas nie”.
In opdrag van Agri Noordwes lui die aanmaningsbrief ook dat Eskom vroeër aangedui het dat hy met lasvermindering op sommige toevoerlyne in Noordwes voortgaan hangende ’n oudit van dié toevoerlyne en die monitor van vermindering om verliese tot ’n aanvaarbare vlak te beperk.
“In die twee maande is die betrokke regstreekse kliënte egter nie deur Eskom gekontak vir die oudit nie, of selfs hoegenaamd nie. Eskom het nie gereageer op navrae van Agri Noordwes oor die oudit nie.”
Sakeliga en KWV Ing. Sê as Eskom nie binne die spertyd van tien dae bevredigend op die aanmaningsbrief reageer nie, sal die saak na die howe geneem word.
Eskom het nog nie op Landbouweekblad se versoek om kommentaar gereageer nie. Agri Noordwes wou nie bykomende kommentaar lewer nie.
Straf
Mnr. Mauritz Lombard, TLU SA se bestuurder van beleidskakeling, sê sy landbou-unie is gegrief dat Eskom blykbaar lasvermindering gebruik om kliënte te straf wie se rekeninge agterstallig is sonder om die opbetaalde kliënte op dieselfde toevoerlyne in ag te neem.
“Hierdie praktyk is oneties en ongrondwetlik omdat dit teen wetsgehoorsame kliënte diskrimineer. Dit is ook nie kontraktueel korrek nie, omdat dieselfde wetsgehoorsame kliënte nou betaal vir dienste wat Eskom nie lewer nie. En hoe verwag Eskom van sy opbetaalde kliënte om voort te gaan om hul Eskom-rekenings te betaal wanneer hierdie kliënte nie die elektrisiteit kry wat hulle nodig het om vir hulself inkomste te genereer nie?”
Hy sê Eskom verbreek sy ooreenkoms met mense wat beurtkrag verstaan, aanvaar en duld, maar wat boonop onderhewig is aan lasvermindering.
