Dis nie net boere wat swaar trek weens beurtkrag nie, maar ook die dorpsgemeenskappe waarop hulle aangewese is vir dienste en in baie gevalle ook die aankoop van hul produkte.
’n Aantal gemeenskappe pluk reeds die vrugte van samewerking en innoverende finansieringsplanne wat gemaak is om veral sonkrag bekostigbaar te maak in gemeenskappe wat dit nie andersins sou kon bybring nie. Landbouweekblad het met drie belanghebbendes gepraat oor hul oplossings en finansieringsmodelle.
Eendag Meule op Bothaville het reeds in 2016 sonkragpanele begin oprig, maar is steeds afhanklik van Eskom-krag om dit te rugsteun, sê me. Hannalie Hayes, besturende direkter van dié meule.
