Die landboubedryf moet die lae wisselkoers benut en kapitale beleggings, soos in toerusting, doen, sê mnr. Mike Schüssler, een van die land se bekendste ekonome.
Hy sê dit is onseker hoe lank die rand op sy huidige vlakke sal bly, en boere moet die situasie so gou moontlik gebruik.
Schüssler was Dinsdag (13 September 2011) een van die sprekers op AMT se 11de landbou-vooruitskouingskonferensie in Pretoria.
“Dit is nou die tyd om die rand te gebruik om in te voer wat jy nodig het om jou bedrywighede op te gradeer,” sê Schüssler. Hy sê die rand gaan weer teenoor ander geldeenhede verswak, “maar dit gaan nie so ’n groot ongunstige uitwerking op kommoditeitspryse hê nie.”
Landbou nie ernstig opgeneem
Schüssler sê as hy kyk na ander lande en die bydrae wat die landbou tot dié lande se ekonomieë maak, is dit duidelik dat “Suid-Afrika landbou nie ernstig genoeg opgeneem nie.
Dit is duidelik dat die onsekerheid, wat byvoorbeeld deur beleidsbewegings veroorsaak is, ’n invloed op landboubeleggings gehad het.”
Hy het die Suid-Afrikaanse bedryf se 3%-bydrae tot die groeikoers met dié van Brasilië (6,9%) en Argentinië (9,6%) vergelyk.
Volgens Schüssler moet die land se ekonomie as ’n saak van dringendheid behoorlike leierskap kry, omdat hy voel dat dit die afgelope drie jaar “leierloos” is.
Verder sê Schüssler die impak van vakbonde op die ekonomie moet verminder word, want loonsverhogings is die afgelope tyd goedgekeur wat die land bloot net nie kan bekostig nie.
“Die ekonomie moet nie aangedryf word deur mense wat op korttermyn-inisiatiewe fokus nie. Ons het ’n verandering van houding nodig, want ons wil vorentoe gaan en ryk wees,” meen Schüssler.
’n Nies
Schüssler sê dit is duidelik dat die Amerikaanse ekonomie tans ’n afswaaifase beleef, “en as Amerika nies, gaan die res van die wêreld ’n verkoue kry, aangesien dit die wêreld se grootste ekonomie is. Ons kan nie met sekerheid sê dat ons nóg ’n erge afswaaifase kan verwag nie, maar ons weet ten minste opkomende lande sal nie so hard geslaan word soos die ontwikkelde lande nie.”
Suid-Afrika se stadiger ekonomiese groei gaan, volgens Schüssler, langer voortduur as wat aanvanklik verwag is. Hy voorspel dat die land se groeikoers tussen 2,8% en 3,1% gaan beweeg.
13 September 2011
