Clover het in ’n aankondiging op die JSE se Sens-nuusdiens gesê Lubbe, tot einde Oktober hoof van aanbodketting by Clover, se goeie kennis van Clover se aanbodketting en DFSA se sakemodel maak hom die ideale kandidaat om DFSA verder te ontwikkel.
Landbouweekblad het vroeër berig dat DFSA, ’n filiaal van Clover, in sy eerste volle boekjaar ’n netto verlies van R128,8 miljoen gely het.
Mnr. Jacques Botha, wat in September as uitvoerende hoof van DFSA bedank het, het gesê die verlies is veroorsaak deur deflasie in verkoopspryse weens die ooraanbod van melk, en koste wat saam met inflasie gestyg het.
Volgens hom was plaashekpryse, in verhouding tot die verkoopsprysdeflasie, te hoog.
DFSA koop onverwerkte melk by boere en betaal Clover om dit te verwerk en te verpak. DFSA lewer ook onverwerkte melk aan Clover vir die maak van sy waardetoegevoegde suiwelprodukte.
Clover het sy bedrywighede vir nie-waardetoegevoegde melkprodukte, soos vars melk, langlewemelk en ultragepasteuriseerde melk, verlede jaar na DFSA oorgedra.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
