Mnr. Francois Strydom, uitvoerende hoof van Senwes, tydens ’n mediabesoek aan sy hoofkantoor op Klerksdorp gesê almal maak deel van die waardeketting uit. Sy onderneming sorg toenemend daarvoor dat infrastruktuur op die platteland in stand gehou word. Dit geld veral vir paaie omdat provinsiale en munisipale regerings se dienste in duie stort.
Hy het in ’n boodskap wat vooraf op video vasgelê is omdat hy uitstedig was, vertel Senwes het twee padskrapers van miljoene rand gekoop om paaie te skraap en te herbou. “Ons lewer nie slegs dienste waardeur ons onder meer werk verskaf en waarde toevoeg nie, maar help ook om infrastruktuur in stand te hou.” Dit is immers in belang van die gemeenskappe waar Senwes dienste lewer. In sommige distrikte bou Senwes paaie oor sodat boere hul produkte kan vervoer.
“Niemand
is meer naïef oor die dienste wat munisipaliteite en provinsiale regerings
lewer nie. Daarom moet ons self opstaan en help. Dis ’n les vir almal om self
betrokke te raak, want sake-ondernemings is die platteland se lewensaar.”
Nogtans wil sommige munisipaliteite nie hul samewerking gee nie.
4 000 km se paaie
Me. Anette Willemse, Senwes se kommunikasiespesialis, het gesê Senwes het reeds meer as 4 000 km se paaie geskraap en herstel.
Me. Elmarie Joynt, hoofregsadviseur en groepsekretaris vir gemeenskapsprojekte, het gesê die oorlog in Oekraïne, wat maande gelede deur Russiese magte binnegeval is, het definitief ’n swaai vanaf mielies na sojabone veroorsaak. Boere plant nog baie mielies, maar aanplantings van sojabone toon ’n stygende neiging. Suid-Afrikaanse boere plant in ieder geval die afgelope jare ál meer sojabone, maar die oorlog het die veldtog verdere stukrag gegee.
Baie boere plant nou ook meer sonneblomme as voorheen, waarskynlik weens die tekort aan sonneblomolie omdat Oekraïene sukkel om onder meer koring en sonneblomolie uit te voer. Dit is omdat die oorlog die uitvoer belemmer. Sonneblomme is egter ’n moeilike gewas om te verbou weens die eiesoortige hantering, opberging, plae en siektes van die gewas.
Sy voorsien dat die dieselprys verder sal styg, maar oor die volgende jaar tot 18 maande kan stabiliseer.
Intussen gaan Senwes voort met sy streng beleid oor die toestaan van produksiekrediet en verkies klante met ’n sterk boerderybasis. In die proses is daar boere wat nie met boerdery kan voortgaan nie, maar daar is ’n neiging dat bure dan hul grond koop om uit te brei. Van die boerderye is nou al so groot dat hulle alleen ’n hele silokompleks se silo’s kan volmaak.
Senwes verkies egter om eers te kyk watter opsies daar is om die boer te help om aan te hou boer.
Beurtkrag is nie net vir boere ’n probleem nie,
maar ook vir Senwes wat 160 kragopwekkers besit om sake te laat voortgaan
wanneer Eskom nie krag lewer nie, onder meer om graan uit silo’s te laai.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
