Mnr. Francois Strydom, uitvoerende hoof van die groep, sê die afdeling vir landboutoerusting se prestasie was beter as in die vorige jaar en tot op datum was die verhoging in totale omset 74% hoër.
“Die groter oes, tesame met die aansienlik hoër kommoditeitspryse, laer rentekoerse en goeie vooruitsigte vir die komende seisoen, het ’n gunstige uitwerking op hierdie mark gehad,” sê hy in ’n verklaring.
“Die eerste ses maande van 2020 sal altyd met die Covid-19-pandemie vereenselwig word, terwyl lae oordragvoorraadvlakke, laat aanplantings, oormatige reënval in April en die swak gehalte van graan soos wat die seisoen verloop het, ’n beduidende uitwerking op die groep gehad het.”
Die groep het desondanks beter presteer as verwag. Sy omset het met 80% tot R3,517 miljard gestyg, terwyl verdienste voor rente, depresiasie en amortisasie met 49% tot R511 miljoen gestyg het.
Kontantvloei gelewer uit bedryfsaktiwiteite beloop R440 miljoen, wat 29,8% meer is as die R339 miljoen in die ooreenstemmende tydperk die vorige jaar.
Wins toeskryfbaar aan normale ekwiteitshouers het met 67,3% tot R281 miljoen gestyg en wesensverdienste per aandeel van 164,1 sent is gelewer, wat 65% hoër is as in die ooreenstemmende tydperk die vorige jaar.
Senwes het ’n tussentydse dividend van 32 sent verklaar.
Vooruitsigte
Strydom sê weens die ontbondeling van Hinterland, die gesamentlike kleinhandelsbesigheid met Afgri, asook die konsolidasie met Suidwes, wat teen Januarie 2021 op die laatste afgehandel sal wees, en vinniger as verwagte herstel ná die verslapping van Covid-19-maatreëls, behoort die groep sy goeie momentum in die volgende ses maande te kan behou.
Mnr. Corné Kruger, finansiële hoof, sê as ’n mens dan in ook ag neem dat ’n normale tot bonormale landbousiklus vir die somergraangebiede verwag word, behoort die Senwes-groep goeie resultate teen die einde van sy boekjaar op 30 April 2021 te lewer.
Die opwaartse druk op kommoditeitspryse en die beskikbaarheid van witmielieprodukte van gehalte sal na verwagting in die laaste kwartaal van die boekjaar verhoog.
