Op ’n onlangse boeredag op me. Maria Tswayi se plaas Scheerpan naby Hertzogville in die Vrystaat het die groep aangekondig dat hy sy vlak 3-kommersiële boere vir ’n verdere vier jaar sal ondersteun. Dié boere is die afgelope paar jaar deel van SerDev se program wat verskeie opkomende boere tot kommersiële boere ontwikkel het, deur hulle in die kommersiële waardeketting te integreer.
SerDev se boere het die Jobs Fund, die staat se amptelike werkskeppingsfonds, se vyfjaarprogram in die Vrystaat, Gauteng en Noordwes suksesvol voltooi. Maar ’n verdere 50 nuwe toetreders uit dié provinsies word ook nou danksy SerDev deur Absa en Sustainable Agriculture, ’n organisasie sonder winsoogmerk, bemagtig om kommersiële veeboerdery te betree.
SerDev ontwikkel tans ’n program vir die Oos-Kaap nadat ’n reuse-aantal boere van dié provinsie op die maatskappy se databasis vir ondersteuning geregistreer het. Hy hoop om teen 2024 ’n teenwoordigheid in dié provinsie te hê.
Volgens me. Petro Naudé, besturende direkteur, ondersoek SerDev tans betrokkenheid by en bystand vir ontwikkelingsprogramme in die Noord-Kaap, Gauteng, Limpopo en Noordwes, ook met die samewerking van ander belanghebbendes. “SerDev voer langtermyn-, volhoubare boere-ontwikkelingsprogramme op distriks- en provinsiale vlak uit en ons kort vennote om hierdie programme te help finansier. Die programme se finansieringsmodel verg gewoonlik 60% skuldfinansiering en 40% se finansiering in die vorm van toelae.”
Naudé sê die SerDev-model skep ’n plaaslike waardeketting binne die projekte, wat verdere finansiering vir die ontwikkelingsprogramme insamel.
’n Webtuiste, www.serdev.co.za, wat ’n gratis aanlyn opleidingsportaal vir boere bied, is onlangs bekend gestel en Serdev het ook sy teenwoordigheid op sosialemediaplatforms soos Facebook, Twitter en LinkedIn gevestig. Die dieregesondheidsmaatskappy Elanco het die aanvanklike opleidingsmateriaal verskaf.
Die maatskappy het meer as 4 000 boere op sy databasis en volgens mnr. Tebogo Molele, senior mentor vir SerDev en organiseerder van die boeredag op Hertzogville, is dit noodsaaklik dat tradisonele swart veeboere ekonomies aktief raak. “Om dit reg te kry, kort ons vennote en soveel boere moontlik om met ons saam te werk om van die veesektor ’n plek te maak waar welvaart vir ontwikkelende boere geskep word.”
