Die 70-jarige vrou wat Dinsdag op ’n hoewe by Lephalale (Ellisras) in Limpopo erg aangerand en verwurg is, se eie seun het op haar afgekom.
Beeld berig ook kort voor of ná die moord Dinsdag op mev. Antjie Parkin is mnr. Thomas Tshabalala, wat jare lank vir Parkin se seun, mnr. Ben Wessels, op die hoewe gewerk het, ook vermoor.
Spoorsnyers het sy bebloede lyk onder opdrifsels op die wal van die Mogolrivier gekry. Landbou.com het gister net kripties hieroor berig.
Parkin het in ’n huis digby haar seun en skoondogter op die hoewe sowat 40 km van Lephalale gewoon. Sy het bedags alleen gebly wanneer haar familie werk toe is, aldus Marietie Louw-Carstens van Beeld.
Mev. Annelie Wessels, Parkin se skoondogter, het gister gesê haar man het Dinsdagmiddag op sy ma se lyk afgekom. Hy het tussen 16:00 en 17:00 tuisgekom en is na die hoofslaapkamer van hul huis.
Hoekslyper
Hy het iets soos ’n elektriese brand geruik. “Hy het gedink hy het sy elektriese kombers aan vergeet. Toe sien hy die hoekslyper langs die bed. Die kluis was oop,” sê mev. Wessels. Die hoekslyper is gebruik om die kluis oop te sny. ’n Vuurwapen is daaruit gesteel.
Mnr. Wessels het dadelik na sy ma se huis gehardloop en haar op die mat van haar slaapkamer gekry, berig Beeld. “Sy is onherkenbaar geslaan en die wurgmerke aan haar nek was duidelik te sien. Niemand behoort jou ma so te sien nie,” sê mev. Wessels.
Die polisie is gebel en die Wesselse het gewonder waar Tshabalala is. Sy lyk is eers laatnag gekry. “Sy kop is inmekaargeslaan en hy is ook verwurg. Hy is ook met ’n mens gesteek,” sê mev. Wessels.
Luidens ’n verklaring van TLU SA-noord het ’n spoorsnypan sowat 10 km van Lephalale op “die spoor van die sosiale terroris” afgekom.“ Suid-Afrika verval in ’n doolhof van bloed, mag en haat,” lui die verklaring.
Dit lyk of die moordenaar deur iemand in ’n motor opgelaai is. Niemand is nog in hegtenis geneem nie.
Parkin word Dinsdag om 11:00 uit die Living Waters-kerk in Sabie begrawe. Sy word deur haar twee seuns, skoondogters en ses kleinkinders oorleef. Geen begrafnisreëlings is nog vir Tshabalala getref nie.
6 Mei 2011
