'n Sindikaat skaapdiewe is aangekeer pas nadat ’n ooi wreed doodgeslaan en keelaf gesny is. Die skade beloop meer as R65 000, berig Volksblad.
Volgens mnr. Hennie van Graan, ’n boer naby die Glen-landboukollege naby Bloemfontein, is 26 van sy SA Vleismerino-ooie, drie lammers en ’n ram van R7 000 vermoedelik eers met bofbalkolwe doodgeslaan en toe keelaf gesny.
Sestien van die ooie het lammers gehad, wat nou tuis versorg moet word. Die res was dragtige ooie wat binnekort sou gelam het. Een lam se bene is ook gebreek en net daar gelos. Die ram is ook in die veld doodgeslaan, geslag en sy ingewande agtergelaat, word berig.
Van Graan sê hy het net die hoogste lof vir die polisie se veediefstaleenheid in Bloemfontein wat slegs ure ná die voorval ses diewe met die karkasse in ’n bakkie betrap het. Die vermoede is dat hulle deel is van 'n sindikaat. Hulle sal eersdaags in die hof verskyn.
Bron: Volksblad.
