Die ontwrigtende weerstoestande wat tot grootskaalse verspoelings en infrasktruktuurskade in KwaZulu-Natal gelei het, kan ’n probleem vir die plaaslike sitrusbedryf inhou as toegang tot die hawe en verwante infrastruktuur nie betyds herstel word nie.
Transnet sê in ’n verklaring dat bedrywighede op die Durbanse terminale op 11 April 2022 opgeskort is, met geen skepe wat die hawe kan in- of uitgaan nie, terwyl vaartuie wat vasgemeer is, op bystand geplaas is.
Mnr. Justin Chadwick, hoofbestuurder van die Suid-Afrikaanse Sitruskwekersvereniging (SKV), sê dit is nog vroeg in die seisoen vir plaaslike sitrusuitvoer. Klein hoeveelhede vroeë suurlemoene, pomelo’s en satsumas is gereed vir uitvoer, maar dat die plaaslike seisoen sal vanaf middel Mei stoom opbou.
“Dit is daarom noodsaaklik dat die paaie, brûe en ander infrastruktuur wat deur die vloede geraak word, teen daardie tyd herstel is. Dan begin volumes toeneem en teen Junie is dit in volle gang. Ons het dus sowat drie of vier weke voordat volumes gaan begin toeneem.”
Chadwick sê ’n verteenwoordiger van die SKV het die toneel besoek waar Bayheadweg, die hooftoegangsroete tot die hawe, deur die vloedwater weggespoel is.
“Dit is die roete wat makliker toegang tot die hawe bied – die ander roetes is veel meer gekompliseerd en kan ’n logistieke probleem inhou as hulle gebruik moet word. Uit wat ons gesien het, is die linkerkantse toegangsroete heeltemal weg, terwyl die regterkantste uitgang nog daar is. Daar is egter vrae oor die toestande van hierdie (regtekantse) baan, en of dit verkeer sal kan dra.”
Intussen is koelkamers tans taamlik leeg. Chadwick sê van die verkoelingsgeriewe is deur die vloede beïnvloed met toegangspaaie wat weggespoel het, maar aangesien dit nog vroeg in die seisoen is, is daar voldoende verkoelingsgeriewe. “Die tyd sal leer hoe die situasie verder gaan ontwikkel, maar ons sal dit dophou en ons lede op hoogte hou.”Hierdie video is gister op die N2 naby die hawe geneem. Dis aan Landbou.com verskaf deur Kwanalu.
