Die Noordwes-Universiteit se botaniese tuine in Potchefstroom is die trotse bewaarders van ‘n bedreigde plantspesie. Luidens ‘n verklaring is die Prototulbaghia siebertii slegs op ‘n paar vierkante meter in die wêreld te vind. Dit is deel van die knoffelfamilie.
Dit is vernoem na prof. Stefan Siebert, ‘n dosent in plantkunde aan die universiteit. Dit is vroeër in die Leolo-bergreeks in Limpopo gevind en is sedertdien by die botaniese tuin gekweek en versorg.
Nuwe spesie en genus
Volgens Siebert is dié ‘n nuwe spesie en ‘n splinternuwe genus van knoffelplante. “Ons weet nog nie veel van dié plant nie, omdat dit ‘n baie geïsoleerde spesie is. Genetiese navorsing word tans in Europa gedoen om die plant se presiese plek binne die knoffelfamilie te bepaal.”
Mnr. Martin Smit, die kurator van die tuine, sê hulle is verbaas dat die plant so goed in hulle kweek- en navorsingsplanthuis aard: “Hulle floreer letterlik en maak sommer aanhoudend nuwe blomme en sade, wat ons kan oes en bewaar om die voortbestaan van die plant te verseker.
"Ons het intussen van dié plante en sade na verskeie botaniese tuine wêreldwyd gestuur en ook ons kennis oor tegnieke vir suksesvolle kweking gedeel, sodat hulle ook die spesie kan help bewaar.”
Bewaring
Mnr. Erich van Wyk, ‘n oud-Puk wat werksaam is by die Suid-Afrikaanse Nasional Biodiversiteitsinstituut (SANBI) en ook koördineerder van die Millenium-Saadbank in Suid-Afrika is, het onlangs die tuin besoek om die plant se sade vir bewaringsdoeleindes te kry.
Volgens van Wyk is hulle deur die Royal Botanic Gardens in Kew, Engeland genader om van die sade te oes en dit in Engeland te gaan bewaar.
24 Februarie 2011
