Heelwat water moet nog in die see loop voordat die Regering kan voortgaan met die ontginning van skaliegas deur hidrobreking, meen mnr. Derek Light, ’n regsverteenwoorder.
Dit kom nadat mnr. Mosebenzi Zwane, Minister van Minerale Hulpbronne, Donderdag by ’n openbare vergadering met die gemeenskap van Richmond in die Noord-Kaap aangedui het dat die Regering besluit het om met die ontginning van skaliegas voort te gaan. Hierdie besluit het hy gesê was op grond van “wetenskaplike bewyse”.
Maar Light sê dat die minister se aankondiging slegs ’n herbevestiging is van die Regering se beleidsbesluit in 2012 dat hy skaliegas wil ontgin. In 2016 het die minister iets soortgelyks by ’n openbare vergadering in die Oos-Kaap kwytgeraak.
Talle bekommerde grondeienaars in Karoo
Light verteenwoordig sowat 400 bekommerde grondeienaars in die Karoo en Agri Oos-Kaap, wat 3000 lede het.
Die howe sal in Mei beslis oor die regsgeldigheid van die tegniese regulasies in die wysigingswetsontwerp op die ontwikkeling van mineraal- en petroleumhulpbronne, wat hidrobreking gaan reguleer.
Light verduidelik indien die regulasies as ongeldig verklaar sou word, sal die Regering weer terug na die tekenbord moet gaan.
“Die regulasies moet in plek wees voordat enige eksplorasiebedrywighede kan voortgaan.”
Eers oor twee jaar?
Zwane, het toe hy oor sy uitlatings deur die nuuskanaal eNCA gevra is wat dit beteken, aangedui dat eksplorasie moontlik eers oor twee jaar moontlik sal wees.
Máár voordat eksplorasie kan plaasvind moet die Regering die inhoud en aanbevelings van die strategiese omgewingsassessering (SOA) oorweeg wat hom moet lei om sy voorgestelde beleid en wetgewing te verwesenlik.
Internasionale verpligtinge
Mnr. Johannes Möller, voorsitter van Agri SA, sê hoewel hulle bewus is van die land se internasionale verpligtinge rakende die vermindering van koolstofuitsette en skoner lug, is hulle nie daarvan oortuig dat daar nie ander maniere soos byvoorbeeld windenergie is wat eerder gebruik kan word nie.
Hy sê daar bestaan steeds baie onsekerhede rakende wat die impak van hidrouliesebreking op die beperkte waterhulpbronne van die Karoo gaan wees.
