Wolpryse het skerp gestyg op Woensdag se veiling in reaksie op die sterk vraag en ’n klein aanbieding, en Cape Wools se Merino-aanwyser het met 6% verbeter tot R61,48/kg (skoon).
Dit is die hoogste vlak van die seisoen en 6,4% hoër as die openingsveiling.
In Australië het die mark ook verbeter en het die Australiese aanwyser vir die eerste keer dié seisoen weer tot bo die sleutelvlak van 900 Australiese sent per kg (skoon) gestyg.
Die rand was 0,7% sterker teenoor die Amerikaanse dollar vergeleke met verlede week se wisselkoers.
Daar was weer sterk mededinging in die verkoopslokaal onder veral die vetwoluitvoerders.
Die pryse van alle tipes het gestyg, maar mediumwol het die grootste stygings getoon.
Die gemiddelde pryse van lang, kamwoltipes (MF5) van gehalte (minder as 1% saadinhoud) was soos volg: 19 mikron was 3,6% duurder op R73,46/ kg; 20 mikron was 6% duurder op R64,84/kg, 21 mikron styg met 6,2% tot R63,41/kg en 22 mikron verstewig met 5,3% tot R61,61/kg.
Sowat 11 000 bale sal volgende week onder die hamer kom.
14 Oktober 2010
