AfriForum het ‘n beroep op die Verenigde Nasies (VN) se menseregteraad gedoen om die ANC se gebruik van die lied “skiet die boer” ten sterkste te veroordeel.
Die organisasie het tydens sy spreekbeurt by die raad se konferensie oor minderheidsaangeleenthede in Genève, Switserland, dié versoek aan die internasionale gemeenskap gerig.
Mnr. Kallie Kriel, uitvoerende hoof van die organisasie, het aan die afvaardiging gesê dat plaasmoorde en –aanvalle krisisafmetings in Suid-Afrika aanneem, en dat die ANC ondanks daarvan steeds voortgaan om die gebruik van die omstrede lied te verdedig.
“Terwyl die ANC aanvoer die slagspreuk moet nie letterlik opgeneem word nie, word boere, vroue en kinders letterlik op plase vermoor.”
Steun vir stelling
Volgens die verklaring het kongresgangers, nadat Kriel sy toespraak afgesluit het deur te beklemtoon dat geweld teen minderhede sterk veroordeel moet word, hande geklap ter ondersteuning van dié stelling.
Kriel het na afloop van die eerste dag van die konferensie gesê hy is dankbaar vir die begrip wat afgevaardigdes toon vir die kwessies wat hy genoem het. Hy sê die organisasie se bywoning van die VN-kongres is die eerste stap om internasionale druk op die ANC te plaas om geweldsmisdaad hok te slaan.
Die organisasie het ‘n hofsaak oor die gebruik van die lied onderneem na dit vroeër die jaar tydens ‘n studentesaamtrek in Johannesburg gesing is.
15 Desember 2010
