Die skietery het ontstaan nadat die private sekuriteitsmaatskappy Magma Security ’n bakkie met vier vermeende veediewe en die vleis van agt beeste wat na bewering gesteel en geslag is, onderskep het.
Mnr. Shaheen Suleiman, besturende direkteur van Mgama, het aan Landbou.com gesê toe die verdagtes sien sy beamptes probeer hulle voorkeer, het hulle na bewering op die Magma-personeel losgebrand. Dié personeel het terugskiet. In die skietgeveg op die N2 in die rigting van Durban is een verdagte doodgeskiet, terwyl die ander drie die voertuig laat staan en in nabygeleë plantegroei ontsnap het.
Ten tyde van publikasie was dié verdagtes nog op vrye voete.
“Die gesteelde en geslagte beeste het aan ’n kleinskaalse vee-eienaar in die Sawoti-gebied van die Suidkus behoort. Gesteelde en geslagte vee is ’n algemene probleem omdat dit vleis verskaf wat goedkoper is as in die kleinhandel. Die aanvraag neem toe voor en gedurende die feestyd, met 10 tot 15 diere per nag wat nou gesteel en geslag word. Kopers is gewoonlik shisanyamas, spysenieringsondernemings, koshuise en individue wat almal beslis weet dat die vleis van gesteelde diere is,” sê Suleiman.
Mnr. Freddie van Tonder, voormalige SAPD-veediefstaleenheidbevelvoerder en nou hoof van veiligheid by die KZN Landbou-unie, sê hoewel veediefstal ’n voortdurende en wydverspreide probleem is, neem dit elke jaar gedurende Desember toe. Die vleis van die gesteelde diere word op maatskaplike byeenkomste en ander feestelikhede gedurende hierdie tyd van die jaar geëet.
Dis nie net vee-eienaars met groot kuddes wat deurloop nie. Diewe steel baie vee in KZN se kommunale gebiede omdat die diere daar dikwels rondloop en onversorg is, wat dit relatief maklik maak om hulle te steel.
Van Tonder het die sukses om die vermeende veediewe op die N2 op te spoor en aan te pak uitsluitlik aan Magma toegeskryf.
“Die kleinerskaalse vee-eienaars word die swaarste deur veediefstal getref omdat hulle tipies klein troppe besit wat dikwels hul enigste bron van inkomste is. As vyf diere uit ’n trop van tien diere gesteel word, is dit die helfte van die eienaar se bate wat in ’n enkele voorval weg is.”
Hy sê hierdie relatief groot verliese vir kleinskaalse vee-eienaars ondermyn drasties hul pogings om op groter skaal tot kommersiële veeboere te ontwikkel.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
