Die skielike dood van mnr. Manuel da Costa (65), boer en landbouleier van Nigel, het skokgolwe deur landboukringe gestuur en boodskappe van meegevoel laat instroom.
Da Costa, of Manny, soos hy bekend was, is Woensdag, (25 Januarie) op slag gedood in ’n motorongeluk tussen sy woonplaas by Nigel en een van sy ander plase by Balmoral. Mnr. Kallie Schoeman van Delmas, wat naby hom boer, sê hy het vermoedelik beheer oor sy voertuig op die N12-hoofweg verloor. Dit het verskeie kere omgeslaan volgens ’n video wat vanuit ’n vragmotor wat agter hom gery het, geneem is.
Manny het sedert 1970 geboer en hy en sy broer, Johnny, het die boerdery Manjoh Ranch oor dekades opgebou tot ’n omvangryke besigheid wat die verbouing van mielies, sojabone droëbone en aartappels, asook ’n Beefmasterstoetery waarin hulle ’n vennoot was, ’n beesvoerkraal, verpakkingsaanleg en graanmeule insluit. Manny se seuns, Tony en André, is ook direkteure.
Manny en Johnny was in 2003 Graan SA (GSA) se Graanprodusent van die Jaar en in 2008 ’n finalis vir SA Boer van die Jaar. Manny was vir jare ’n hoofbestuurslid van GSA en raadslid van die Beefmastertelersgenootskap.
Mnr. Jaco Minnaar, voorsitter van GSA, het sy skok oor Manny se dood uitgespreek en gesê die landbou het ’n waardevolle ambassadeur verloor. Manny was nog baie betrokke by GSA se jaarlikse Nampo-oesdag, waar hy een van die vriendelike mense was wat eregaste verwelkom het.
