Mnr. Senzeni Zokwana, Minister van Landbou, Bosbou en Visserye, sê die wetenskaplike komitee van die Internasionale Organisasie vir Dieregesondheid (OIE) het spesifieke kwessies uitgewys wat aandag moet kry.
Suid-Afrika het sy bek-en-klouseerstatus in Februarie 2011 verloor, wat na raming verliese van R4 miljard per jaar aan verlore landbou-uitvoergeleenthede meegebring het. Die status is in Februarie 2014 herstel en volgens prof. Edith Vries, direkteur-generaal, word so ’n status jaarliks bevestig.
Volgens Zokwana was die OIE-komitee met sy besoek in 2014 bemoedig deur vordering wat sedert 2013 op sekere gebiede van die beheer van bek-en-klouseer gemaak is, soos beesidentifikasie deur die gebruik van oorplaatjies en die oprigting van ’n rooilynheining wat die beskermingingsone in KwaZulu-Natal van die vrye sone skei.
Die OIE sê die volgende kwessies moet nou aandag kry:
• Beter beheer by die Zimbabwe-grens;
• Duidelike tekens wat die ingange tot beheer- en vrye sones aandui;
• Vakante poste in kritieke gebiede in provinsiale veeartsenykundige dienste moet aandag kry en amptenare moet die nodige vervoer hê om behoorlike bek-en-klouseerbeheer moontlik te maak;
• Die grense van die vrye- en die beskermingsones moet duidelik geskei wees;
• Heinings moet die buffels in die Ndumo-wildreservaat van die beeste daarbuite skei;
• Die algemene waarneming van bek-en-klouseer in die beskermings- en vrye sones moet verbeter word, en voorkeur moet gegee word aan waarneming van buffels in die Ndumo- en Tembe-wildreservate in KwaZulu-Natal;
• Entstof teen bek-en-klouseer moet volhoubaar beskikbaar wees; en
• Diere en diereprodukte uit beskermingsones moet by slagplase geskei word van diere en produkte uit vrye sones.
Mnr. Gerhard Schutte, hoof uitvoerende beampte van die Rooivleisprodusente-organisasie (RPO), sê dit is goeie nuus dat die land se status bly geld.
“ ’n Groot poging van die departement en die bedryf is nou nodig. Dit lyk of die politieke wil daar is.”
Mnr. Dave Ford, uitvoerende direkteur van die Suid-Afrikaanse Voerkraalvereniging, het die taak wat voorlê as enorm beskryf en gevra dat sekere kwessies voorrang geniet omdat alles nie in ’n kort tydperk afgehandel kan word nie. Volgens Zokwana is die lewendehawebedryf, ter waarde van meer as R50 miljard rand, ’n belangrike bydraer tot werkskepping en veral plattelandse mense se bestaan.
