Dr. Dion George, DA-LP en skaduminister van finansies, sê dit is noodsaaklik dat die minister van finansies, mnr. Enoch Godongwana, die mediumtermynbegroting in Oktober benut om verligting op voedselpryse te bied aangesien voedselpryse tans buitensporig hoog is.
George meen die skrap van BTW kan noodsaaklike voedselsoorte tot 15% goedkoper maak. Die DA het Godongwana ook versoek om ’n paneel kenners saam te stel wat raad kan gee oor watter voedselsoorte van Oktober af vergestel moet wees van BTW.
“BTW teen ’n nulkoers op ’n veel groter mandjie noodsaaklike voedsel sal miljoene se verligting in voedselbelasting tot gevolg hê. Die ongevoelige ANC-regering moet nou ingryp om voedselpryse te verminder aangesien meer mense hulself in hongersnood bevind.”
Volgens hom doen regerings wêreldwyd noemenswaardige stappe om mense deur die huidige lewenskostekrisis te help, tog sit die ANC op sy hande. “Ons doen ’n beroep op Suid-Afrikaners om hul steun en kommentaar oor die skrap van BTW op meer noodsaaklike voedsel duidelik te maak ten einde die minister van finansies te wys hoe hy moet optree.”
Die sperdatum vir kommentaar is 20 Oktober. Godongwana sal na verwagting sy mediumtermynbegroting op 26 Oktober lewer. Steun en kommentaar op die DA se voorstel kan by www.cutfoodcosts.co.za gelewer word.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
