Die SKV verteenwoordig reeds meer as 1 560 kwekers van Suid-Afrika, Eswatini, Zimbabwe en Botswana.
Justin Chadwick, uitvoerende hoof van die SKV, sê daar is groot potensiaal wat in Namibië se ontluikende sitrusbedryf ontsluit kan word.
“Hoewel die opbrengs nog relatief klein is, met net minder as 500 ton sitrus wat verlede jaar gelewer is, het Namibiese kwekers ’n tienjaarplan vir uitbreiding opgestel met die doel om op 10 000 ha met sitrus te boer en 60 000 werkgeleenthede teen 2033 te skep.”
Om dié doelwit te behaal, is sowat 100 000 nuwe sitrusbome verlede jaar geplant. Boere in die noorde van die land is besig met planne vir uitvoer.
André Neethling van Sitrus Namibië, wat in die Tsumeb-streek in die noorde van Namibië boer, sê dit is ’n land met baie geleenthede. “Dit is in ons belang om met die vernaamstes soos die SKV geassosieer te word om ons strategie te bevorder en ’n sitruskwekende nasie te word. Ons respekteer die SKV se ervaring en kennis. Ons is seker dat om lid van die organisasie te word, ons sal help om ons doelwitte te bereik.”
Die SKV bied onder meer hulp met die uitbreiding van marktoegang, navorsing en tegniese steun, asook logistieke koördinering aan Namibië se sitrukwekers.
Volgens Chadwick bly die SKV daartoe verbind om die potensiaal van sitruskwekers in Suider-Afrika te ontsluit en te verseker dat dit een van die wêreld se grootste uitvoerders van gehaltesitrus bly. “Deur ons kennis en steun aan mekaar oor te dra, kan ons saam groei en tot die streek se ekonomiese vooruitgang bydra.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
