Twee gevalle van Slenkdalkoors onder mense is in die Noord-Kaap gediagnoseer nadat ‘n siek dier hanteer is.
Luidens ‘n verklaring van die Noord-Kaapse departement van landbou, grondhervorming en landelike ontwikkeling word boere en die landelike gemeenskappe gewaarsku om versigtig te wees vir die siekte.
Volgens die departement het ‘n boer en plaaswerker van Calvinia, wat ‘n siek dier hanteer het, positief vir die siekte getoets.
Water ‘n probleem
Staande water, soos wat tans deur die vloede in die provinsie veroorsaak word, kan die uitbreking van die siekte vererger omdat dit deur muskiete oorgedra word.
Boere word aangemoedig om hulle diere betyds teen die siekte in te ent, en om te sorg dat hulle en hulle werkers beskermende klere dra wanneer hulle diere wat vermoedelik die siekte het of daaraan gevrek het, hanteer.
Intussen wag Landbou.com steeds op antwoorde van die nasionale departement oor waar die siekte andersins ook uitgebreek het.
Twee voorvalle is in die Wes-Kaap bevestig, en na meer as ‘n week kan die departement steeds nie die vermeende geval in Bronkhorstspruit bevestig nie.
1 Februarie 2011
