In die 110 jaar van sy bestaan het die Land Bank al talle probleme die hoof moes bied, maar steeds bly dié instelling uiters noodsaaklik vir die Suid-Afrikaanse landbousektor en die ekonomie in die geheel.
Oor baie dekades het die bank ’n groot rol gespeel in die kommersialisering en uitbreiding van die landbousektor deur die nodige finansiële ondersteuning aan boere landwyd te verskaf, selfs wanneer ander finansiers onwillig was om die risiko te loop wat noodgedwonge met landboufinansiering gepaard gaan.
Hierdie pogings het in ’n groot mate die ontwikkeling van die Suid-Afrikaanse landbousektor gesteun en verseker dat ons stabiele voedselsekerheid op nasionale vlak het.
