Deur die noodsaaklikste vervoerkorridors vir landbouprodukte in Suid-Afrika te karteer hoop Agbiz om die weg te baan vir vennootskappe tussen die staat en die private sektor wat ’n einde kan maak aan bottelnekke in die bedryf se logistiek.
Mnr. Theo Boshoff, uitvoerende hoof van Agbiz, het op die onlangse Subtrop-bemarkingsimposium op Witrivier gesê Agbiz het pas ’n memorandum van verstandhouding met Transnet onderteken wat die staatsinstelling, Agbiz, produsente- en ander landbou-organisasies sal laat saamwerk om te bepaal watter volumes moet langs watter roetes vervoer word. Dit sal aandui wat die noodsaaklike roetes is en wat die belangrikste infrastruktuurbehoeftes is om logistieke vloei te verbeter.
Hy het gesê hoewel Transnet die afgelope tyd vir homself baie slegte publisiteit op die hals gehaal het, is die instelling bereid om te luister en te leer.
Agbiz het byvoorbeeld vroeër op ’n vergadering met van Transnet se bestuurslede agtergekom dat dié staatsinstelling se bestuur nie bewus is van die seisoenale verskepingsbehoeftes van die landbou nie.
Daar is aan die bestuur gewys hoe landbou die aandrywer van sekere spitstye op hawens is. In die somermaande is dit byvoorbeeld die uitvoer van tafeldruiwe en ander vrugte wat skeepsvragverkeer uit die Kaapstadhawe laat toeneem. In die winter kom die hawens in die Oos-Kaap en Durban weer onder druk omdat dit die sitrusuitvoerseisoen is.
“Deur hierdie inligting onder die Transnet-bestuur se aandag te bring stel ons hulle in staat om deeglik te beplan vir diensonderbrekings vir onderhoudswerk.”
Hulp van buite
Boshoff het gesê hoewel privatisering amper ’n vloekwoord in die Suid-Afrikaanse politiek is, is die regering bewus van sy beperkinge en besef hy dat die private sektor deel sal moet wees van die oplossings.
Die afgelope twee jaar is daar dus baie klem gelê op die noodsaaklikheid vir vennootskappe tussen die regering en private sektor.
Transnet is bereid om vennootskappe aan te gaan wat die bedryf en bestuur van infrastruktuur betref waar dit slegs spesifieke bedrywe dien. Dit kan byvoorbeeld spoortaklyne wees wat nodig is om vrugte in ’n sekere gebied op te laai.
Daar kan gekyk word na konsessies en kontrakte om lokomotiewe te bedryf wat treine haak en sleep.
Boshoff het gesê Agbiz beywer hom ook vir die uitbreiding in kapasiteit en die gedeeltelike privatisering van vraghouerterminale by hawens. Dit is egter moeiliker om daarvoor te onderhandel omdat vraghouers nie net deur die landbousektor gebruik word nie en daarom gooi Agbiz daarvoor sy gewig agter Busa, wat namens verskeie sakesektore onderhandel.
Dit kan beteken dat verskillende bedrywe aan die karteringproses deelneem om ’n groter geheelbeeld van die behoeftes en potensiële oplossings vir Suid-Afrika se logistieke probleme te kry.
Die memorandum van verstandhouding, het Boshoff gesê, gaan egter baie doen om landboubedrywe vinniger by die regte vennootskappe uit te bring en dit beter te struktureer.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
