Die Nasionale Oesskattingkomitee het vanjaar se rekord-mielieoes opnuut verhoog, tot net onder 16 000 ton. Mark-ontleders het die afgelope week aangedui dat hulle ’n groter oes as die Junie-skatting verwag, maar die jongste maand-raming (15 969 300 ton) is selfs nóg hoër as die 15,77 tot 15,8 miljoen ton wat hulle verwag het.
Vanjaar se oes behoort dus meer as dubbel so groot as verlede jaar se droogtegeknelde 7,78 miljoen ton te wees. Dit is sowat meer amper 6 000 ton meer as die verwagte binnelandse verbruik van 10,1 tot 10,4 miljoen ton in die bemarkingsjaar, en heelwat meer as die skattingskomitee se eerste raming (13,9 miljoen ton) in Februarie.
Dit is ook die grootste mielie-oes in Suid-Afrika se geskiedenis. Dieselfde geld vir die verwagte gemiddelde opbrengs van 6,08 ton/ha vanaf 2,629 miljoen ha. Die Vrystaat se beraamde oes staan nou net onder 7 miljoen ton, gevolg deur Mpumalanga, wat ’n verwagte 3,284 miljoen ton gaan produseer, en die Noordwes, met 2,978 miljoen ton. Dié drie provinsies het dus ’n volle 83% tot die 2017-oes bygedra.
Die res van die verwagte somer-oeste, van sonneblomsaad, sojabone en sorghum is nie vanaf die Junie-skatting aangepas nie. Die verwagte droëboon-oes is effens, met 0,1%, verhoog.
Wintersaaiery skraal
Aan die wintergraan-kant, waar die primêre produksiegebiede steeds onder rekorddroogte deurloop, geld die teenoorgestelde prentjie.
Die eerste, voorlopige skatting van die oppervlakte onder koring is 498 850 ha. Dit is amper 2% minder as verlede seisoen se 508 365 ha. Dit is ook die derde kleinste aanplanting sedert die 1930’s. Die kleinste nasionale aanplanting was 476 570 ha in 2014, gevolg deur 482 150 ha in 2015.
Die Wes-Kapenaars het 325 000 ha geplant, wat 2 000 ha meer as verlede seisoen is, en in die Vrystaat is ’n beraamde 90 000 ha geplant, wat 20 000 ha minder as verlede seisoen is.
Die Noord-Kaapse besproeiingboere het met verhoogde aanplantings ingespring. Hulle het verlede jaar se 35 000 ha na ’n beraamde 38 000 ha vanjaar opgestoot. Kanola-aanplantings is ook vanjaar aansienlik uitgebrei, vanaf verlede jaar se 68 075 ha tot vanjaar se 87 000 ha. Dit verteenwoordig ’n verhoging van amper 28%.
