Mildred het haar departement se begroting van R3,2 miljard in die Nasionale Vergadering ter tafel gelê.
Suid-Afrika se eerste nasionale minimum loon van R20 per uur sal ná die afhandeling van parlementêre prosesse in werking gestel word.
Oliphant het in haar begrotingsrede gesê dat die instelling van ’n minimum loon die enigste “beleidsvereiste” in die Vryheidsmanifes is wat nog uitstaande is. “Wanneer dit gefinaliseer is, kan ons terugstaan en met reg afkondig dat die opdrag voltooi is.”
Sy het ook houe uitgedeel aan diegene wat die loon teenstaan en gesê hulle gee nie werklik vir die werkers om nie. “Ten minste weet almal vandag wie werklik vir die kwesbare werkers omgee en wie voorgee.” Volgens haar is van die propaganda teen die instelling van die minimum loon niks anders as ’n verkiesingsfoefie om punte aan te teken voor volgende jaar se nasionale verkiesing nie.
“Dit is ironies dat daar heelwat werkgewers is wat reeds hul werkers se loon aangepas het, terwyl die wetgewers besig is met skyngevegte oor die nasionale minimum loon. Dit is ook bemoedigend dat hierdie werkgewers die werkers se loon opwaarts aanpas en nie afwaarts, soos ander ons wil laat glo, nie.”Op 1 Maart het die sektorale vasstelling vir die landbou met 5,7% gestyg, wat neerkom op R16,25 per uur.Die landbousektor het spesiale vergunning gekry om by die minimum loon aan te pas wanneer dit ingestel word. Sy loon sal begin met 90% van die verpligte R20 per uur, wat neerkom op R18 per uur (R3 150 per maand) wat oor twee jaar ingefaseer moet word.Departement misluk
Daar is reeds 9,2 miljoen werklose mense in Suid-Afrika en die instelling van die minimum loon kan ’n verdere miljoen werksverliese meebring, het mnr. Michael Bagraim, die DA se skaduminister van arbeid, gesê.
Volgens hom bestuur Oliphant ’n mislukte departement en speel sy met haar duime terwyl Suid-Afrika brand. “Weens die Regering se mislukking om werk te skep en omdat die arbeidsregulerende gesag die handrem op indiensneming getrek het, het misdaad en armoede toegeneem.”
Hy het gesê die Kommissie vir Versoening, Bemiddelling en Arbitrasie (KVBA) is die enigste deel van die departement wat nog reg funksioneer, maar sy begroting by dieselfde. “Tog wil die ANC-regering by die werkmag spog oor die minimum loon wat hy gaan instel. Dit sal die werklading van die KVBA met meer as 30% verhoog.”Die kommissaris van die KVBA het al gesê met ’n verhoging in werklading sal hy nie die begroting hê om die nasionale minimumloon in werking te stel nie.
