Die raad, wie se lede groot kettingwinkelgroepe en voedselvervaardigers insluit, het vroeër in vandeesweek in ’n brief aan Ramaphosa gesê as die beurtkragkrisis voortduur, kan hulle nie waarborg dat daar altyd voedsel, medisyne en ander noodsaaklike goedere op rakke sal wees nie.
Volgens die raad toon die staatsrede begrip van die kragkrisis en Suid-Afrika se benarde ekonomiese situasie, maar meer besonderhede is nodig oor wat die regering gaan doen om voedselveiligheid en -sekerheid te bevorder.
Die CGCSA is wel baie bekommerd dat ’n minister van elektrisiteit aangestel gaan word. “Dit is ondenkbaar dat die president in hierdie tawwe ekonomiese tye en in die konteks van ’n opgeblase staatsdiensloonrekening dié aanstelling oorweeg. Ons reken dat die kabinet eerder ’n vaardige en praktiese persoon op direkteur-generaalvlak moet aanstel om die taak uit te voer.”
Die CGCSA hoop verder mnr. Enoch Godongwana, minister van finansies, het sy voorstelle vir brandstofrabatte, wat by Nedlac bespreek is, oorweeg en sal in die komende begrotingstoespraak daaraan aandag gee.
Oor die ramptoestand sê die raad hy kan nog nie hierop kommentaar lewer nie omdat daar nog nie besonderhede beskikbaar is nie. Die besonderhede behoort deur ’n openbare proses en strukture soos Nedlac bepaal te word.
Die raad doen ’n beroep op die regering om die kragkrisis vinnig op te los en sê sy sektor wil saam met die regering aan die verlammende probleme werk wat ekonomiese groei en heropbou bedreig.
Die CGCSA hou aanstaande maand ’n simposium vir leiers in die sektor vir snelbewegende verbruikersgoedere en sal Ramaphosa en sy kabinet nooi om deel te neem aan die gesprekke wat daarop gemik is om praktiese en gesamentlike oplossings te vind.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
