Die Grondwethof se uitspraak oor sonering by mynbou word verwelkom, maar kommer bestaan steeds oor die bedryf se invloed op die landbou, sê Agri SA.
Luidens ‘n verklaring het die hof bepaal dat waar grond nie vir gebruik vir mynbou gesoneer is nie, voortaan nie met mynbou voortgegaan mag word mits die plaaslike owerheid die sonering aanpas en dié gebruik aangedui word nie.
“Die uitspraak plaas grondeienaars en plaaslike owerhede dus in ‘n sterker posisie om byvoorbeeld landbougrond vir landboudoeleindes te beskerm deur mynbou op ‘n bepaalde stuk grond te verbied,” lui die verklaring.
Vriend van die hof
Mnr. Dan Kriek, voorsitter van Agri SA se natuurlike hulpbronkomitee, sê die organisasie het as ‘n vriend van die hof by die hofsaak van Maccsand (Edms) Beperk teen die Stad Kaapstad betrokke geraak. Die organisasie is uiters besorg oor die impak wat mynaktiwiteite tans en in die toekoms op die landboubedryf en op die land se voedselproduksie kan hê.
“Terwyl Agri SA die belangrikheid van mynbou vir Suid-Afrika verstaan, is dit ons standpunt dat daar met mynbou-ontwikkeling te min waarde geheg word aan omgewingskwessies en die langtermyn-impak daarvan op grond en water en derhalwe op volhoubare voedselproduksie,” vertel Kriek.
Die organisasie het die hof se aandag probeer vestig op die nodigheid van beter balans tussen mynbou en die landbou, veral wat die beskerming van die regte van die grondeienaar betref.
“Agri SA sou daarom graag wou sien dat die Grondwethof pertinent standpunt inneem oor die impak van mynaktiwiteite op voedsel en water, soos beskerm in Artikel 27 van die Grondwet”, aldus Kriek.
19 April 2012
