Die deregulering van padvragvervoer in 1989 het die land duur te staan gekom, het ’n amptenaar van die Departement van Vervoer in die Parlement gesê.
Die geldelike agterstand vir die instandhouding van paaie was toe R72 miljard. Tans is dit al byna R140 miljard. Mnr. Clement Manyungwana, waarnemende adjunkdirekteurgeneraal vir geïntegreerde vervoerbeplanning by die departement, het aan die Parlement se portefeuljekomitee vir vervoer gesê dat daar onvoldoende belegging in die land se spoornetwerk en vragtreine is.
Nie genoeg begroot
Hoewel Transnet R110 miljard oor die volgende vyf jaar begroot het om in hawens, die spoornetwerk en pyp lyninfrastruktuur te belê, is dit steeds nie genoeg nie, meen hy. Manyungwana het uitgewys dat sowat 720 miljoen ton van die totale 900 miljoen ton vrag in 2003 per pad vervoer is.
Slegs 180 miljoen ton vrag was per spoorvervoer. Teen 2007 het die hoeveelheid padvrag byna verdubbel. Van die 1 578 miljoen ton vrag is altesame 1 373 miljoen ton per pad en slegs 205 miljoen ton per spoor vervoer.
Die vervoersektor se bydrae tot die land se bruto binnelandse produk (BBP) in 2007 was van 6,6% (R74 miljard). Net die padvragsektor se bydrae was 5,9% (R66 miljard). Altesame 87% van die land se goedere word per pad vervoer.
Groter belegging nodig
Daarom word dit al hoe dringender dat ’n groter belegging in die land se verouderde spoornetwerk gemaak moet word, het hy gesê.
Van die landboukommoditeite wat gunstig is om per spoor vervoer te word, is onder meer mielies, sojabone, sonneblomsaad, koring, pluimvee en suiwelprodukte, hout en houtprodukte, kunsmis en plaagdoders.
Die spoornetwerk het egter nie die vermoë om al hierdie kommoditeite te vervoer nie.
31 Augustus 2011
