Van die sprinkaanswerms in die Noord-Kaap het die vlieërstadium bereik. Me. Janine Byleveld, bedryfsbeampte by Agri Noord-Kaap, sê talle swerms kom in veral die westelike, suidelike en noordelike gedeeltes van die Noord-Kaap voor.
Sy sê distriksprinkaanbeamptes en voormanne hou dié swerms deur die dag dop. Die sprinkane word snags bespuit nadat hulle geland het. Na verwagting kan die sprinkane teen die einde van die week die oostelike gedeeltes van die provinsie, spesifiek die distrikte Frances Baard, Kimberley en Douglas, bereik.
Agri Oos-Kaap het verlede week luidens ’n plasing op sy Facebookblad gesê spuitspanne werk volstoom in die meeste gebiede waar sprinkaanswerms voorkom. Dié spanne werk dag en nag om die uitbreking te beheer en te voorkom dat swerms volwassenheid bereik en verder oos versprei.
Boere en die publiek word versoek om sprinkaanswerms so spoedig moontlik aan te meld by me. Mulalo Matodzi by 083 326 7773, me. Vuyokazi Mpumlwana by 084 760 8176 of dr. Ikalafeng Kgakatsi by 072 198 9882.
Boere kan swerms ook by die kantoor van die departement van landbou op De Aar aanmeld by 053 631 3122 of 053 631 3261, of by dr. Gerhard Verdoorn by 082 446 8946.
