Sprinkaanplae wat tans voorkom, kan later ’n probleem word omdat hulle nie behoorlik gespuit word nie, aldus Agri SA.
Mnr. Hoffie Joubert, die organisasie se verteenwoordiger vir migrerende plae, sê: “As daar nie vinnig drasties opgetree word nie, gaan die boere in die Vrystaat probleme hê in Desember.”
Volgens Joubert kom baie voetganger- of rooibaadjiesprinkane tans in 22 streke in die Noord-Kaap en die Karoo voor.
“Hulle word plek-plek gespuit, maar daar is baie boere wat vroeër gespuit het, wat nie nou bereid is om te spuit of kan spuit nie. Hulle wag nog vir die geld wat die nasionale Departement van Landbou, Bosbou en Visserye aan hulle moet betaal vir die spuitsessie wat hulle in Februarie en Maart vanjaar onderneem het.”
Joubert sê die sprinkane is veral volop in die distrikte van Victoria-Wes en Brandvlei, en in Namakwaland.
Reën
Hy sê hoewel baie sprinkane nou uitbroei, beperk die hoeveelheid reën wat tot dusver geval het die getalle. “Dit het nog net kol-kol hier gereën. As dit behoorlik hier gaan reën, gaan daar groot probleme wees.”
Intussen sê mnr. Hein Rust, hoof van die rampbestuursentrum van die sentrale Karoo-munisipaliteit naby Beaufort-Wes, vandeesweek word meer en meer swerms noord van die Nuweveldberge aangeteken. “Hulle veroorsaak tans redelik probleme, maar aan Lainsburg se kant van die berg is die swerms aan die afneem.”
Rust sê die spuitspanne word egter onrustig omdat baie van die sprinkane reeds die vlieërstadium bereik het. “Dit is ook moeilik omdat baie spinkane in die Karoo Nasionale Park by Beaufort-Wes voorkom en daar mag hulle nie gespuit word nie.”
Meld aan
Mnr. Johan van Rensburg, hoofbestuurder van Agri Noord-Kaap, moedig boere aan om die voorkoms van sprinkane op hul plase aan te meld sodat die spuitverenigings die voetgangers kan doodspuit.
Hy sê dit is baie moeilik om die sprinkane te bekamp as hulle eers die vlieërstadium bereik het, want dan vlieg hulle deur die dag rond en vreet gras en aanplantings. Hulle kan dan slegs in die nag gespuit word.
8 November 2011
