Die uitbreking van sprinkaanswerms, wat ’n massiewe area en feitlik al die paaie in die Noord-Kaap bedek, is besig om in ’n lewensgroot ramp vir die provinsie te ontaard, sê me. Janine Byleveld, bedryfsamptenaar by Agri Noord-Kaap.
Dit veroorsaak ernstige ongelukke aangesien mense volgens haar nie besef hoe glad die sprinkane die pad maak as hulle doodgetrap word nie. Volgens Byleveld was daar gedurende die afgelope naweek noodlottige ongelukke omdat mense nie stadiger ry wanneer hulle die sprinkane op die pad gewaar nie.
Sy sê Agri Noord-Kaap reël lugondersteuning vir die spuitspanne omdat daar eenvoudig nie genoeg pompe beskikbaar is om die area wat die sprinkaanswerms tans bedek, te bespuit nie. “Ons is besig met onder meer geldinsamelings om ’n vliegtuig in die lug te kry om die sprinkane te bespuit. Dit kan nie meer net te voet gedoen word nie. Die spuitspanne kort bykomende hulp. Net in die Noord-Kaap is daar 300 pompe te min.”
Dit kos volgens haar van R15 000 tot R20 000 per uur om ’n vliegtuig in te span om die sprinkane te bespuit. Die departement van landbou, grondhervorming en landelike ontwikkeling het ingestem om by te dra tot lugondersteuning.
Sy sê as daar nie vandeesweek voldoende gespuit kan word nie, sal die sprinkane vlieërs word wat in Noordwes en Vrystaat sal eindig. “Ons kan nie bekostig dat die sprinkane daardie twee provinsies tref nie. Dit sal Suid-Afrika se voedselkettings omvergooi.”
