Die Vukani-projek om die vestiging van boere ’n hupstoot te gee, is deur mnr. Gugile Nkwinti, Minister van Landelike Ontwikkeling en Grondhervorming, in Bloemfontein van stapel gestuur.
Dit behoort binnekort na ander provinsies uitgebrei te word. Nkwinti het die plaas Cecilia, een van elf plase in die Vrystaat waarvan produksievlakke geknou is nadat dit vir grondhervorming bekom is, besoek.
Altesame R22 miljoen, ’n kwart van die elf plase se gesamentlike waarde, is vir die projek bewillig. Met die geld is onder meer toerusting en Nguni-beeste vir dié plase gekoop.
Nkwinti sê hy wil gereelde vorderingsverslae oor die projek hê. “Selfs al gaan dit sleg, moet julle praat sodat ons betyds iets daaraan kan doen. Ons is nou ’n span.”
Mnr. Vusi Mahlangu, waarnemende direkteur-generaal van landelike ontwikkeling, sê die projek sal voedselsekerheid, inkomste, werksgeleenthede en vaardigheidsontwikkeling vir plaasbewoners meebring. Hy sê die program sal gebruik word om soveel moontlik lesse te leer, dit te boekstaaf en dan te gebruik om op ander plase oor die land toe te pas.
20 Desember 2010
