Onsekerheid oor wie in beheer van sekere stukke staatsgrond, waarop restitusie-eise is, is ’n groot struikelblok vir die Departement van Landelike Ontwikkeling en Grondhervorming.
Só sê adv. Vela Mngwengwe, verantwoordelik vir ondersteuningsdienste vir openbare grond by die departement.
Volgens hom ondervind die departement in die algemeen nie probleme om staatsgrond vir die doel van herverdeling oor te dra nie, maar wel vir restitusie. “Ons ondervind uitdagings om die beheerder van die staatsgrond te identifiseer om eise af te handel.
“Sedert 2012 het ons prosedures ontwikkel wat ’n gids vir alle staatspfere sal wees om die Grondeisekommissie te help om daardie eise vinniger te finaliseer.”
Mngwengwe sê onakkuratheid rakende staatsgrond wat aan eisers oorgedra moet word, word eers bespeur wanneer die minister die eis onderteken het, maar die grondreg nog nie herstel of vergoeding uitbetaal is nie.
Deur middel van die Wetsontwerp op die Regulasies vir Grondbesit, sal die departement ’n beter prentjie kry van wie watter grond besit. “Die wetgewing sal dit moontlik maak dat inligting oor die verandering van grondeienaarskap rakende staatsgrond verklaar moet word sodat ons nie sit met ’n situasie waar ’n bate rondlê en niemand verantwoordelikheid daarvoor neem nie, of dit word verkoop en ons weet nie daarvan nie,” sê Mngwengwe.
Dié wetsontwerp sal ook die grondplafonstruktuur van die land aandui.
Mnr. Gugile Nkwinti, Minister van Landelike Ontwikkeling en Grondhervorming, sê die wetsontwerp behoort volgende jaar na die Parlement te gaan. Die Afrikaanse Handelsinstituut is ook besig om 'n voorlegging rakende die wetsontwerp saam te stel.
Nkwinti is van plan om die voorleggingsproses teen einde Desember afgehandel te handel.
