In die afdeling vir nuwe masjinerie en werktuie was mnr. Jannie Boshoff van die plaas Doornhoek, distrik Delareyville, die wenner met ’n masjien waarmee ongewenste plantmateriaal vooraf uit grondbone verwyder kan word om die dopproses te versnel.
Mnr. Bertus Goosen, ’n bekende by Nampo wat jaarliks vanaf Matlakeng in Botswana deelneem, was tweede in die afdeling met ’n unieke toestel waarmee hy plastiese pype ongeskonde uit boorgate kan verwyder.
In die afdeling vir aangepaste masjinerie en werktuie was die Qualtin-ingenieursaanleg van mnr. Quintin le Roux van Stilfontein eerste vir die herboude stropertafel. Hy het nuwe lewe in ’n ou Case-tafel, wat vir die skrootwerf bestem was, geblaas en teen ’n fraksie van die prys van ’n nuwe werktuig, herstel. Mnr. Jannie Myburgh van Ermelo, ook ’n bekende deelnemer, was tweede met ’n aangepaste kommersiële rotsbreker wat gebruik word om pale maklik te plant.
Goosen se nood om pakke sonpanele en waterverwarmers maklik op die dakke van geboue vir installasie te hys, het hom genoop om met die ontwerp van ’n mobiele hyser vorendag te kom. Daarmee het hy die eerste plek in die afdeling vir nuwe gereedskap verdien. Die naaswenner, met ’n boorgatskoonmaker, was mnr. Willie Crous van Klerksdorp, wat vir die 22ste keer aan die kompetisie deelneem. Crous en sy seun, Tinus, was vanjaar bedrywig met hul ontwerpe wat met die herstel van windpompe te doen het.
Nog ’n staatmaker in die kompetisie was mnr. Gerrit Smith van Klerksdorp, wat in die afdeling vir aangepaste gereedskap met ’n unieke manier om die binddraad rondom sparre vas te draai, vorendag gekom het.
Op dié foto verskyn: Die beoordelaars van Graan Suid-Afrika se 27ste jaarlikse patentkompetisie met Omnia-kunsmis, wat al 22 jaar lank betrokke is. Van links is mnre. W.H. van Zyl (GSA), Andries Theron (ondervoorsitter van GSA), Piet Groenewald (Omnia), Chris Schoonwinkel (voorsitter van die paneel), Hannes Haasbroek (GSA) en Donald Brink (Omnia). Foto: Johan Norval
