So lag mnr. Theunis Pretorius van die MD Foundation, die bekende saamboer vennootskap van Ficksburg in die Oos-Vrystaat, oor die smal brûe wat hulle stropers en trekkers moet oorsteek soos hulle tussen die boerderygroep se wydverspreide gronde beweeg.
“Die bruggies is in die veertiger jare gebou, en ons masjiene het oor die jare al hoe groter geraak, so ons moes maar plan maak.”
Na die brûe se reëlings verdwyn het, het Pretorius toestemming van die munisipaliteit gekry om die groot sement blokke op die hoeke van die brûe gelyk te maak sodat ‘n stroper op die kante kon ry sonder dat hulle elke keer een van die dubbelwiele eers moet groot moeite moes afhaal.
“‘n Man moet maar op die middel van die pad fokus as jy so oor ‘n brug ry. As jy na die kant toe afkyk word jy lekker bang!” is Pretorius se raad. “Dit is my vennoot, Hannes Pretorius, se laaitie Willie wat die stroper in die video oor ’n brug ‘n paar kilometer buite Rosendal bestuur. Dit was ook sy eerste keer oor so ’n brug, so hy was maar lekker senuweeagtig!”
Pretorius sê hulle verwag ’n kleiner oes as verlede jaar. “Die midsomer droogte en al die reën in Maart en April het maar sy skade gemaak.”
