Twee stropers is in die Kruger Nasionale Park doodgeskiet terwyl 16 renosters glo die afgelope 24 uur vir hul horings doodgemaak is.
Luidens ’n verklaring is die stropers Woensdagaand (11 Januarie 2012), in ’n skermutseling met veldwagters geskiet. Sanparke sê die mans was glo van Mosambiek afkomstig.
Volgens Sanparke het dié voorval gevolg ná veldwagters en lede van die Weermag ’n soektog na stropers onderneem het. Die soektog het gevolg ná agt vars renosterkarkasse, waarvan die horings verwyder was, binne 24 uur gevind is.
’n Vuurwapen en ander jagtoerusting is by die verdagtes gevind. ’n Lugsoektog word vandag (12 Januarie 2012) onderneem om vas te stel of die stropers moontlik nog renosters doodgemaak het.
Nóg karkasse gevind
Intussen berig Beeld (12 Januarie 2012), benewens die agt karkasse wat gevind is, is daar glo nóg drie renosterkarkasse Woensdag (11 Januarie 2012), in die Kruger-wildtuin gevind. Sanparke het na bewering nog nie dié vonds bevestig nie.
’n Tweede vonds is ook Woensdag by die Kwanare private reservaat naby Stoffberg gemaak, waar vyf renosters glo onlangs vir hul horings doodgemaak is. Dit bring die totaal op 16 renosters te staan.
Volgens die berig is ’n noodvergadering in Skukuza gehou om ’n strategie vir die krisis in die wildtuin te bespreek. Mnr. Rey Thakuli, woordvoerder van Sanparke, sê: “’n Teenstropingstrategie is op die tafel, maar daar gaan nou saam met die lede van Natjoints gekyk word hoe die toepassing daarvan bespoedig kan word.”
Bron: Beeld
12 Januarie 2012
