Mnr. Stuart Symington is deur die raad van toesig oor die uitvoer van bederfbare produkte (PPECB) aangestel as die organisasie se nuwe hoof uitvoerende beampte (HUB). Symington was voorheen die HUB van die Uitvoerforum vir Vars Produkte.
Symington is uit 64 kandidate gekies om mnr. Luvyuo Mabombo op te volg. Mabombo het die organisasie in Augustus verlaat. Symington, wat tien jaar lank by die Uitvoerforum vir Vars Produkte gewerk het, is baie opgewonde oor sy nuwe pos. Hy sê sy grootste uitdaging is om geloof in die organisasie te herstel:
“Ek wil die PPECB se dienste verpak sodat lede kan sien ons voeg waarde toe tot die bedryf. Wanneer heffingverhogings aangekondig word, sal hulle dan nie omgee om meer te betaal nie,” het hy aan Landbou.com verduidelik.
Hy wil dít bereik deur te verseker die PPECB verskaf die dienste wat hy veronderstel is om te verskaf; om verhoudings met lede en ander organisasies te versterk en om meer in pas te wees met wat verskillende markte vra.
“Ons moet altyd onthou dat die mark die rede vir ons lewensvatbaarheid is,” sê hy.
'Ken die bedryf'
Mnr. Louis Voster, voorsitter van die PPECB, is baie gelukkig met die nuwe aanstelling: “Symington ken die bedryf soos die palm van sy hand. Hy ken die sterk en swak punte van die PPECB. Hy sal ons kan help om vir ons lede ’n mededingende voordeel te gee bo lande wat nie so ’n organisasie het nie.”
Mnr. Anton Rabe, HUB van Hortgro, het ook die nuus verwelkom: “Dit is ’n goeie skuif. Symington ken die behoeftes van die mark en sy kliënte en hy het die vermoë om goed wat op die oomblik lastig is by die PPECB reg te stel.
"Dit sluit in ’n gebrek aan kapasiteit, inkonsekwentheid en ondoeltreffende inspeksies, dienste wat nie kostedoeltreffend uitgevoer word nie en ’n bestuur wat uit voeling geraak het met die behoeftes van sy lede.”
Symington sal in Februarie in sy nuwe pos begin werk.
28 November 2011
