Die stryd oor toelating tot die fakulteit veeartsenykunde aan die Universiteit van Pretoria is besig om in ’n massiewe rassedebakel te ontwikkel.
Studente het hulle vandag saam met ? afvaardiging van AfriForum Jeug swart geverf en voor die departement van hoër onderwys protes aangeteken teen die rasseteikens wat dié departement stel.
AfriForum Jeug verteenwoordig tans sowat 30 matrikulante/voornemende studente wat gesamentlik 190 onderskeidings in matriek behaal het, maar deur die UP se Fakulteit veeartsenykunde weggewys is weens beweerde swak akademiese prestasie.
Mnr. Charl Oberholzer, nasionale voorsitter van Afriforum Jeug, sê daar word plekke vir internasionale studente gereserveer terwyl studente wat tussen sewe en nege onderskeidings behaal het, die deur gewys word.
Rasseteikens
Nadat AfriForum Jeug ingevolge die Wet op die Bevordering van Toegang tot Inligting die UP gedwing het om inligting bekend te maak oor waarom hierdie aansoekers nie toelating gekry het nie, het die universiteit aangedui dat die departement van hoër onderwys rasseteikens stel en dat hulle daarvolgens geoormerkte finansiering ontvang.
Die departement se oogmerk is dat die UP se Fakulteit veeartsenykunde die nasionale demografie moet weerspiëel.
“Jongmense wat eers in 1993 gebore is, moenie gebuk gaan onder rasgedrewe beleide nie. Hulle verdien ? billike geleentheid en hulle waardigheid word aangetas wanneer hulle in raskategoriëe ingedeel word,” sê Oberholzer.
AfriForum dring daarop aan dat rasseklassifisering gestaak word sodat alle rasse gelyk behandel kan word.
30 Januarie 2012
