Die knellende droogte beteken allermins die einde van die vraag na spogplase in die Klein Karoo, sê Seeff se landbou-agente.
Terwyl die droogte 'n stewige greep op talle boere se insetkoste en wins het, is landbougrond steeds gewild.
Volgens 'n verklaring van Seeff stel kopers belang in plase wat wissel van 'leefstyleiendom' vir diegene wat vir 'n naweekwegbreek uit die stad wil vlug, tot groot wild- en kommersiële plase.
Volgens me. Imelda Egan van Seeff Ladismith is kopers ook nie bang om hulle beursies uit te haal vir 'n goeie prys nie!
Egan sê Seeff ontvang veral navrae van kopers uit die noordelike deel van Suid-Afrika, wat opsoek is na die leefstylelement wat kleiner plase bied.
Volgens mnr. Johan van Eeden van Seeff Barrydale is Kaapse plase baie gewild.
"Ons vind meer en meer kopers wat uit die groot stede wil vlug na die Kaap. Die Klein Karoo is veral gesog omdat dit steeds deel is van die gewilde Karoo-omgewing maar ietwat groener is met meer water," sê Van Eeden.
Byskrif: Dié kommersiële plaas in die Langeberg-omgewing is tans in die mark vir R34,2 miljoen. 'n Melk- en vrugteboerdery word hier op 164ha bedryf. Foto: Seeff
