Die veldtog, wat Home Sweet Home genoem word, sal daarop konsentreer om verbruikers bewus te maak van hoe die plaaslike produkte lyk en hulle aanmoedig om die plaaslike bedryf te ondersteun. Plaaslike suikerprodukte kan uitgeken word aan die Trots Suid-Afrikaans-kenteken agterop die pak.
Die bedryf het in 2017 ’n groot terugslag beleef toe 500 000 ton suiker belastingvry ingevoer is en sy markaandeel weggekalwe het. In 2018 is die land se gesondheidsheffing op suiker ingestel wat koeldrankvervaardigers minder suiker laat gebruik het. Nagenoeg 400 000 ton suikerverkope het verlore gegaan. In die eerste seisoen ná die instelling van die heffing het die bedryf inkomste van R1,3 miljard verloor, wat 10 000 werksgeleenthede in die suikerrietkwekersektor bedreig het.
Plaaslike suiker beter
Mnr. Rex Talmage, voorsitter van die SA Canegrowers, sê vir elke ton ingevoerde suiker verloor die plaaslike bedryf R4 000.
“Hierdie goedkoop ingevoerde suiker van lae gehalte het meegebring dat die plaaslike bedryf meer as R2,2 miljard net in die afgelope jaar verloor het.”
Hy sê dat verwag word dat ’n rekordhoeveelheid suiker tariefvry uit Eswatini sal instroom. Die verwagting is dat hierdie buurland 715 000 ton suiker sal lewer. Meer as die helfte daarvan, plus die invoer van suiker van elders ter wêreld, sal op die Suid-Afrikaanse mark beland. Dit bring mee dat die Suid-Afrikaanse suikerbedryf gedwing word om sy suiker teen rekordlae pryse uit te voer na ’n reeds versadigde wêreldmark.
Die toekoms van nie net die bedryf in geheel nie, maar ook dié van 21 000 swart kleinskaalse kwekers, 65 000 plaaswerkers, die 270 000 indirekte werksgeleenthede en ’n miljoen mense se bestaansmiddele word bedreig.
Talmage sê ingevolge die meesterplan vir die suikerwaardeketting word daaraan gewerk om die vraag tot 150 000 ton suiker per jaar te laat herstel in die eerste twee jaar van toepassing, en dit te laat toeneem tot 300 000 ton in die derde jaar.
Om dit te vermag het klein- en groothandelaars hulle daartoe verbind om 80% van hul suiker plaaslik aan te skaf. Teen die derde jaar sal hulle 95% van hul suiker plaaslik aankoop.
