Dié maatskappy, wat handelsname soos Selati, Epol, Rainbow Chicken en Bobtail insluit, se wesensverdienste het in die ses maande tot einde Desember met 26,3% tot R475 miljoen afgeneem. Hy skryf die skerp daling grootliks toe aan goedkoop ingevoerde suiker en hoendervleis wat in Suid-Afrika gestort word.
“In die algemeen geniet die internasionale landbou subsidies en ander ingrypings van regerings. Dis hoekom hulle produkte in Suid-Afrika stort. Want hulle kan. Selfs al verhoog die Suid-Afrikaanse regering die invoertariewe, wat nie dikwels gebeur nie, maak die oorsese produsente steeds ’n wins,” sê Dally.
Die Suid-Afrikaanse landbou word telkens op die agtervoer geplaas omdat dit lank neem voordat die Regering teen storting optree. RCL se suiker-en meulenaars-afdeling se verdienste voor rente, belasting, waardevermindering en afskrywing (ebitda) het in die ses maande tot Desember verlede jaar met R143 miljoen (28,5%) tot R358 miljoen gedaal, grootliks weens die uitwerking van goedkoop ingevoerde suiker.
Dally verwag dat die regering se tariewe op ingevoerde suiker wat verlede Augustus ingestel is, in die volgende ses maande sal begin om die verliese te stuit. “Weens die storting moet ons meer suiker uitvoer in ’n gedempte wêreldmark. Ek hoop die regering se maatreëls sal die vloei van goedkoop invoer stuit.”
Die verhoogde invoer van hoendervleis van veral Brasilië en Amerika bly ’n probleem vir die plaaslike hoenderbedryf. RCL Foods het sy hoenderbedrywighede die afgelope paar jaar aansienlik geherstruktureer om winsgewender te wees. Volgens Dally het sake verbeter en is die groep tevrede met die vordering.
“Ons is egter steeds weerloos in die mark vir kitsbevrore stukke, wat die meeste deur invoer benadeel word. Die marges is bitter klein. Wanneer voerkoste styg en jy het ’n surplus, soos nou, druk kleinhandelaars die prys af tot by die punt waar ons ’n verlies op die produk maak.”
Listeriose
Die maatskappy se handelsmerk Rainbow Chicken het skade gely toe sy hoenderpolonie verkeerdelik by die listeriose-krisis betrek is en hy al sy verwerkte vleisprodukte aan die mark moes onttrek. Toetse kon agterna geen tekens van listeriose in sy aanlegte vind nie. Die polonieprodukte is van verlede Augustus weer op die winkelrakke. Volgens Dally is die verkoopsvolume nou sowat 80% van wat dit voor die krisis was.
Die maatskappy is goed gediversifiseer. Ondanks die terugslae in die hoender- en suikerafdelings het ander sake-eenhede, soos kruideniersware, goed presteer. Dally is veral ingenome met die markaandeel wat Nola (mayonnaise) en Yum-Yum (grondboonbotter) gewen het. “Ons Pieman’s-pasteie het nie net markaandeel gewen nie, maar verkope het ook gegroei, terwyl wins gestyg het.” Die maatskappy se nuwe troeteldierkos, Feline Cuisine en Canine Cuisine, is volgens Dally ook goed deur die mark ontvang.
Remgro en Vector Logistics
Tot 77,5% van RCL Foods se aandele word nou deur die beleggingsbeheermaatskappy Remgro besit. Verlede jaar het Remgro ook die Spreads-onderneming (met handelsmerke soos Rama, Flora en Stork) van Unilever verkry. Volgens Dally skep die transaksie goeie geleenthede vir RCL en vir Spreads, wat nou deur RCL se groter bemarkingsplatform toegang tot die kleinhandelmark kry. “Dit gee Spreads meer trefkrag as wanneer hy op sy eie gestaan het, terwyl ons vir die bestuursdienste wat ons lewer, bestuursgeld van Remgro ontvang, wat weer ons oorhoofste koste verwater.”
Vector Logistics, RCL se logistieke afdeling, se ebitda het met 16,5% tot R88,5 miljoen gedaal, hoofsaaklik weens hoër insetkoste. “Die kostestygings is nie net aan die hoër brandstofprys te wyte nie. Ons het verlede jaar die kontrak gekry om al Pick n Pay se bevrore voedsel te vervoer. Onlangs het hy ook sy roomysvervoer bygevoeg. Dit het heelwat belegging van ons geverg om in hierdie superbevrore-kategorie ook sake te doen,” sê Dally.
Eskom
Soos ander maatskappye wat in Suid-Afrika sake doen, meld RCL Foods in sy jaarresultate hoe lustelose ekonomiese groei sy vooruitsigte belemmer. Dally sê dis nie net die gebrek aan groei wat die maatskappy terughou nie. “Daarmee saam kom infrastruktuur wat verkrummel weens korrupsie en onbevoegdheid, soos ons nou met Eskom sien.” Hy wil ook graag sien dat beleidsonsekerheid wat tot groot onvoorspelbaarheid in die waarde van die rand lei, daadwerklik verminder.
“Dis baie moeilik vir ’n sake-onderneming om in sulke omstandighede vooruit te beplan. Ons hoop met die hernude fokus van die Regering op werkskepping en groei, sal dinge verbeter.”
Die maatskappy se tussentydse dividend van 15c per aandeel is onveranderd teenoor die vorige ooreenstemmende tydperk. Sy aandeelprys het Maandag gunstig op die resultate gereageer en teen 13:00 met 7,5% tot R13,85 verhoog. Dis egter steeds 25% laer as ’n jaar gelede.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
