SITFE, ’n inisiatief van SA Suikerrietkwekers, bestaan reeds 57 jaar en het gedurende die covid-19-pandemie sy klem verskuif om studente te steun wat nie hulpmiddele soos data, boeke en skootrekenaars kan bekostig nie.
Die fonds het nou R5 miljoen vir sy beursprogram beskikbaar gestel, wat deel vorm van die suikerbedryf se onderneming om oor die volgende vyf jaar meer as R1 miljard in die bedryf se transformasie te belê.
Hoewel die beursprogram hoofsaaklik op kinders van suikerrietkwekers en plaaswerkers in KwaZulu-Natal en Mpumalanga gemik is, kan alle studente in toepaslike studierigtings daarom aansoek doen.
Volgens mnr. Andrew Russell, voorsitter van SA Suikerrietkwekers, is die doel van die program om steun te bied aan gesinne in gebiede waar suikerriet gekweek word en wat ’n inkomste van R350 000 tot R600 000 per jaar verdien. “Ons doen dit so omdat hierdie families gewoonlik van finansieringskemas vir studente uitgesluit word.”
Hy sê die suikerbedryf is een van die mees arbeidsintensiewe bedrywe in die landbousektor en skep as gevolg daarvan baie noodsaaklike werksgeleenthede in veral landelike gebiede. Baie hiervan is egter laergeskoolde werksgeleenthede. “Deur hierdie beurs-inisiatief hoop SA Suikerrietkwekers om meer van die land se jeug te bemagtig met die vaardighede wat vir ’n professionele loopbaan in hierdie bedryf benodig.”
Beursaansoeke sluit op 31 Oktober. Besoek www.sitfe.co.za of stuur ’n e-pos na bursaries@sasa.org.za vir nog inligting.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
