Die SASV se aansoek vir vryskelding is tot 31 Junie 2021 goedgekeur op voorwaarde dat die inligting wat die SASV en sy lede uitruil, beperk is tot dit wat nodig is om uitvoering te gee aan die oogmerk van die meesterplan vir die suikerwaardeketting wat vir tot 2030 ontwikkel is, sonder dat mededinging op lang termyn in gedrang gebring word.
Rede vir aansoek
Die vereniging het op 17 Augustus vanjaar die aansoek ingedien en die kommissie het dit goedgekeur, terugwerkend vir die tydperk vanaf 1 Julie 2020 tot 31 Junie 2021. Die aansoek het gevra dat produsenteprysverhogings vir suiker in toom gehou moet word ten opsigte van tydsberekening, kennisgewing en die manier hoe die soort prysverhogings toegepas word; om vertroulike mededingende inligting uit te ruil en betrokke te raak by verskeie ingrypingsopsies wat ingestel kan word om kleinskaalse suikerrietprodusente te ondersteun en te verseker dat hulle ’n volhoubare deel van die suikerwaardektting word; vertroulike mededingende inligting met die belanghebbendes in die suikerbedryf, insluitend suikerrietkwekers, meulenaars en suikerrafineerders uit te ruil tot voordeel van die herstrukturering van die bedryf; en ook inligting uit te ruil met die Eswatini-suikervereniging, insluitend inligting oor produksievolumes, plaaslike en uitvoerverkoopsvolumes, pryse en die identifikasie van geleenthede vir diversifikasie sodat daar met die Eswatini-suikervereniging geskakel kan word om beleidsharmonisering ten gunste van albei lande se suikerprodusente te bereik.
Voorwaardes
Die jaar lange vrystelling is onder sekere voorwaardes toegestaan. Van die voorwaardes is dat daar geen koördinering en uitruil van inligting tussen die meulenaars rakende werklike pryse aan kleinhandelaars, grootmaathandelaars en industriële suikerverbruikers plaasvind nie.
Meulenaars moet steeds onafhanklike besluite rakende pryse of verhogings kan neem.
Die inligting wat uitgeruil kan word om kleinskaalse suikerrietkwekers te behou en te ondersteun, is beperk tot die koste van produksie en volume-uitsette en die inligting moet anoniem en per streek uitgeruil word. Geen inligting mag verskaf word aan individue buite die strukture van die SASV nie en alle inligting wat die bedryf wil uitruil, moet via die SASV gedoen word. Ook belangrik is dat alle inligting deur ’n fasiliteerder van die departement van handel, nywerheid en mededinging goedgekeur word voordat dit uitgeruil mag word.
