Produksie is met tot 35% verhoog en sowat 100 nuwe werkgeleenthede is geskep met die uitbreiding van Country Bird Holdings (CBH) se hoenderproduksie-aanleg by Tigane in Noordwes.
Die uitbreiding het ’n belegging van R180 miljoen geverg. Dit maak Supreme Chicken nou die grootste werkgewer in die gebied, wat ekonomiese aktiwiteite in meer as 2 000 huishoudings bevorder.
In sy toespraak het mnr. Kaobitsa Bushy Maape, premier van die Noordwes, CBH geloof vir sy toekomsgerigte besluite en dat die maatskappy midde-in die covid-19-pandemie hierdie projek aangepak het. Hy het gesê die regering sal alles in sy vermo? doen om ’n gesonde werksomgewing onder besighede te bevorder om meer werkgeleenthede te skep en om die stygende werkloosheid hok te slaan.
Mnr. Brendon de Boer, uitvoerende hoof van CBH, het gesê die uitbreiding by Tigane was die volgende stap in die maatskappy se strategie om Supreme Chicken se produksie in pas te kry met die aanvraag van die groeiende mark.
“Ons beweeg weg van 50% se produkte wat individueel gevries word tot net 15%. Ons het nou die vermoë om meer vars produkte te lewer aan klante en restaurante wat dit toenemend verkies.”
Gehaltebeheer en verhoogde produksie
Hy het verduidelik dat gehaltebeheer makliker is met vars hoender en dat dit onsekerheid of die korrekte protokol vir bevrore produkte gevolg is, uitskakel. Dít verseker meer voedselveiligheid.
“Heelwat tyd word bespaar wanneer die hoender nie eers ontdooi moet word voordat dit afgelewer word nie. Dít is baie belangrik in mededingende besighede.”
As deel van die uitbreiding is ’n nuwe, omgewingsvriendeliker verkoelingstelsel in die abattoir geinstalleer. Verbeterde tegnologie vir die hantering van hoenders dra ook by tot die algemene welstand van die pluimvee.
“Noudat ons vermoë groter is, is ons produksiekoste per eenheid laer. Gevolglik kan ons meer bekostigbare hoendervleis aan ’n wyer mark lewer.”
Die aanleg het die vermoë om sowat ’n miljoen hoenders per week te verwerk.
Mnr. Izaak Breitenbach, hoof van die Suid-Afrikaanse Pluimveevereniging se braaihoenderorganisasie, het gesê die Tigane-uitbreiding en die verhoogde produksie is tekenend van die sektor se toegewydheid om werkgeleenthede te skep.
“Dit is opwindend om die passie en innovasie waarmee pluimveeprodusente soos CBH kwessies in die bedryf oorkom, te sien. Wanneer ons na die bedryf kyk is dit duidelik dat Suid-Afrika se voedselstelsel in goeie hande is.”
