Sowat 300 lede van African Farmers’ Association of South Africa (Afasa) en die nasionale organisasie vir opkomende rooivleisboere (Nerpo) het Pretoria op 25 Oktober in 'n stoet binnegery en voor die Uniegebou gaan betoog, met die hoop dat pres. Jacob Zuma hul versoekskrif sou ontvang.
Hulle was nie beïndruk dat mnr. Mdu Shabane, direkteur-generaal van die Departement van Landelike Ontwikkeling en Grondhervorming, vir dié taak gestuur is nie.
Mnr. Aggrey Mahanjana, sekretaris-generaal van Afasa en groepbesturende direkteur van Nerpo, het gesê Zuma moet binne 24 uur telefonies ontvangs erken, anders sal die boere wéér 'n optog hou.
'Regering maak net planne, voer niks uit nie'
Afasa en Nerpo sê in die versoekskrif die Regering is al jare lank “voortdurend in beplanningsmodus en kom byna nooit sover om die planne met betekenisvolle invloed uit te voer nie”.
Aanstaande jaar behoort as Jaar van die Kommersialisering van Swart Boere verklaar te word, sê hulle.
Boere moet in staat gestel word om grond te besit of langtermyn-verblyfsekerheid te hê. “Die grondhervormingsproses het baie swart boere as onwettige plakkers op grond gelaat, met geen bewys van verblyfsekerheid nie en sekerlik geen eienaarskap van die grond nie.
As sake verander
“Sou die politieke getye verander, sal baie swart boere geen toevlug hê om op die grond te bly waarop hulle boer nie,” lui die versoekskrif.
Die organisasies eis verder dat die Regering se hulpprogramme hulle in staat moet stel om mededingend gehalteprodukte vir hoofstroommarkte te kan produseer. “Die produsent-steunprogramme het nie gehelp om boere se ondernemings tot haalbare kommersiële eenhede te ontwikkel nie.
“Pleks daarvan is 'n self-vernietigende afhanklikheidsindroom gekweek, met baie begunstigdes wat nie op hul eie kan oorleef wanneer steun eindig nie.”
Waarde vir geld
Om seker te maak die Regering kry waarde vir die geld wat bestee word, moet vordering met ontwikkeling van swart boere gemonitor word en provinsies en distrikte wat swak presteer, onder administrasie van die Departement van Landbou, Bosbou en Visserye geplaas word, lui die versoekskrif.
Mnr. Jannie de Villiers, uitvoerende hoof van Graan SA, en me. Annette Steyn, DA-skaduminister oor landbou, het die betoging bygewoon om hul steun te wys.
“Ons is moeg daarvan dat die boere nie titelaktes kan kry om te produseer nie,” het De Villiers gesê, terwyl Steyn die belangrikheid van titelaktes benadruk het omdat dit nodig is as kollateraal.
