Vyf studente wat ‘n driejaar opleidingskursus in sybokhaarboerdery suksesvol voltooi het, is verlede week beloon, toe ‘n plaas van 5 500 ha in die Jansenville-distrik aan hulle oorhandig is.
Die plaas Uitkomst, wat 33 km noord van Jansenville geleë is, is onlangs teen R15,6 miljoen deur die Departement van Landelike Ontwikkeling en Grondsake aangekoop.
Prof. Dan Sandi, senior streekbestuurder in die westelike gebied van die Oos-Kaap, het sy dank teenoor die provinsie se kommersiële boere uitgespreek wat “nie wag dat die regering hulle vra om iets vir grondhervorming te doen nie, maar self na vore gekom het en hulp aangebied het.”
Me. Sarah Louw, een van die vyf studente wat bemagtig is, het gesê hulle is vasberade om nie klein of opkomende boere te bly nie, maar binnekort volwaardige kommersiële boere te wees.
Die studente het hulle opleiding op die plaas Hardwood by Klipplaat ontvang. Die projek het vier jaar gelede tot stand gekom toe South African Mohair Industries Limited (SAMIL) 210 Angorabokke en drie ramme geskenk het. Die Angoraramtelersvereniging het ook vyf ramme beskikbaar gestel en Virbac, ‘n veemedisynemaatskappy, het die veemiddels geborg.
Mnr. Gielie Grobler, ‘n voormalige voorsitter van die Sybokhaarkwekersvereniging wat as mentor opgetree het, het gesê hy is vol vertroue dat die vyf nuwe boere ‘n sukses sal maak, aangesien hulle gretig was om te leer en deurentyd baie hard gewerk het. “Bloot die feit dat daar vanjaar 260 lammers geoes was van die 230 ooie wat gelam het, is ‘n bewys van hulle toewyding om goed na die vee om te sien.
Die Hardwood-sybokhaaropleidingsinisiatief is ‘n samewerkingsaksie tussen die Ikwezi-munisipalitiet, die provinsiale departement van landbou en die sybokhaarbedryf. Vyf nuwe studente het reeds met opleiding begin.
20 September 2010
